Aowa, ka gobane motho yo mongwe le yo mongwe o swanetše go itirela phetho ya gore o tla hlankela Modimo goba go se bjalo. (Baroma 14:12) Dihlatse tša Jehofa di ruta bana ba tšona melao yeo e lego ka Beibeleng. Eupša ge bana bao ba gotše ba swanetše go itirela phetho ya gore ba nyaka go ba Dihlatse tša Jehofa goba ga ba nyake.—Baroma 12:2; Bagalatia 6:5.

 Go swana le batswadi ba bantši, Dihlatse tša Jehofa le tšona di kganyogela bana ba tšona dilo tše dibotse. Di ruta bana ba tšona dilo tšeo di tlago go ba hola. Dilo tšeo di akaretša go ruta bana mekgwa e mebotse, mešomo e bohlokwa gotee le melao ya ka Beibeleng. Dihlatse tša Jehofa di dumela gore Beibele e thuša batho gore ba thabele bophelo. Ka gona di ruta bana ba tšona Beibele e bile di ya le bona dibokeng tša Bokriste. (Doiteronomio 6:6, 7) Ge ngwana yoo a gotše a ka itirela phetho ya go ba Hlatse ya Jehofa.

•  Na Dihlatse tša Jehofa di kolobetša masea?

•  Na Dihlatse tša Jehofa di hloile bana ba tšona bao ba kgethago go se kolobetšwe?

•  Ke ka baka la’ng batswadi ba Dihlatse tša Jehofa ba sepela le bana ba bona ge ba eya go ruta batho Beibele?

•  Na Dihlatse tša Jehofa di keteka matšatši a itšego a maikhutšo goba meletlo e mengwe?

•  Bana bao ba godišitšwego ke Dihlatse tša Jehofa ba ikwa bjang?

 Aowa. Beibele ga e thekge taba ya gore masea a kolobetšwe. Ka mohlala, e bontšha gore pele Bakriste ba mathomo ba ka kolobetšwa, ba ile ba ‘amogela lentšu la Modimo ka pelo ka moka’ ke moka ba sokologa. (Ditiro 2:14, 22, 38, 41) Ka gona, e le gore motho a kolobetšwe, o swanetše go ba a gotše ka mo go lekanego gore a ka kgona go kwešiša seo Beibele e se rutago. Le gona o swanetše go se dumela e bile a be a dirile phetho ya go phela ka sona. Masea ga a kgone go dira dilo tšeo.

 Ge bana ba gola ba ka ikgethela go kolobetšwa. Gore ba kgone go dira seo, ba swanetše go kwešiša bohlokwa bja kolobetšo.

 Aowa. Le ge batswadi ba nyama ge bana ba bona ba kgetha go se be Dihlatse tša Jehofa, ba no tšwela pele ba ba rata. Ga ba hloye bana ba bona feela ka gobane ba kgetha go se be Dihlatse tša Jehofa.

 Go na le mabaka a mantši ao a dirago gore re sepele le bana ba rena ge re eya go ruta batho Beibele. a

•   Beibele e laela batswadi gore ba rute bana ba bona ka Modimo ba be ba ba tlwaetše go mo hlankela. (Baefeso 6:4) Ka ge go hlankela Modimo go akaretša go bolela phatlalatša ka tumelo ya rena, Dihlatse tša Jehofa di dira seo ka go ruta bana ba tšona go bolela le batho ka Beibele.—Baroma 10:9, 10; Baheberu 13:15.

•   Beibele e kgothaletša bafsa ka go lebanya gore ba “[tumiše] leina la Jehofa.” (Psalme 148:12, 13) Go botša batho ba bangwe ka Modimo ke karolo e kgolo ya go mo tumiša. b

•   Bana ba a holega ge ba eya go bolela ditaba tše dibotse le batswadi ba bona. Ka mohlala, ba ithuta go boledišana le batho bao ba fapafapanego. Le gona ba ithuta goba le dika tše dibotse tša go swana le kwelobohloko, botho, tlhompho le go naganela batho ba bangwe. E bile go bolela ditaba tše dibotse go ba thuša gore ba tlwaele dithuto tše bohlokwa tša Beibele.

 Dihlatse tša Jehofa ga di keteke matšatši a maikhutšo goba meletlo yeo Modimo a e hloilego. c (2 Bakorinthe 6:14-17; Baefeso 5:10) Ka mohlala, ka ge Beibele e sa thekge matšatši a matswalo le keresemose, le rena ga re di keteke.

 Lega go le bjalo, re thabela go fetša nako le ba malapa a rena le go fa bana ba rena dimpho. Ga re emele matšatši a kgethegilego khalentareng gore re thabe le ba malapa a rena goba gore re ba fe dimpho. Go e na le moo, re etelana nako e nngwe le e nngwe le go fana dimpho nako e nngwe le e nngwe.