Re diriša meneelo go thekga mediro yeo e lego gona mokgatlong wa rena le go thuša badumedigotee le rena. Re dira mediro ye go thuša batho gore e be barutiwa ba Jesu Kriste.—Mateo 28:19, 20.

 Ga re diriše meneelo ya rena go thuša batho ba itšego gore ba hume. Bagolo le batho ba bangwe bao ba rutago ka diphuthegong ga ba patelwe e bile Dihlatse tša Jehofa ga di patelwe ge di ruta batho ka ntlo le ntlo. Batho bao ba šomago diofising tša rena tša makala le ntlongkgolo ya lefase ka bophara, go akaretša le ditho tša Sehlopha se Bušago sa Dihlatse tša Jehofa, ke ditho tša mokgatlo wa bodumedi tšeo di sa hwetšego mogolo.

•   Dikgatišo: Ngwaga le ngwaga re a fetolela, ra phrintha le go romela Dibeibele tše dimilione le dikgatišo tše dingwe tša Bokriste. Eupša ge re di fa batho, ga re ba patediše. Ka mo go swanago, JW Library app le wepesaete ya rena ya jw.org di dira gore dikgatišo tša rena di hwetšagale ntle le go di lefelela. Le gona ga re diriše dipapatšo go hwetša tšhelete.

•   Go Aga Meago le go e Hlokomela: Re aga mafelo a borapedi lefaseng ka moka le go a hlokomela. Diphuthego di bokana gotee le go rapela Modimo mafelong ao. Re aga le diofisi tša makala le diofisi tša bofetoledi ra ba ra di hlokomela. Mošomo wo o dirwa ke baithaopi gomme seo se thuša gore re se ke ra diriša tšhelete ye ntši kudu.

•   Kamoo Modiro wa Rena o Hlokomelwago ka Gona: Mešomo yeo e dirwago ntlongkgolo ya rena, diofising tša makala, diofising tša bofetoledi gotee le mešomo yeo e dirwago ke bahlankedi bao ba etelago diphuthego tša Jehofa, e thekgwa ka meneelo.

•   Go Bolela Ditaba tše Dibotse: Dihlatse tša Jehofa ga di patelwe ge di ruta batho ba bangwe “lentšu la Modimo.” (2 Bakorinthe 2:17) Eupša di ekiša mohlala wa Bakriste ba mathomo ka go kgonthišetša gore batho bao ba tlwaeditšwego gore ba fetše nako e ntši ba ruta batho lentšu la Modimo ba hwetša mafelo a bodulo e bile ba thušwa ka dilo tšeo ba di hlokago.—Bafilipi 4:16, 17; 1 Timotheo 5:17, 18

•   Go Ruta: Dikopano tša rena tša tikologo le tša selete di thekgwa ka meneelo. Go tlaleletša moo, re dira mananeo a go theetšwa le dibidio tšeo di bolelago ka Beibele. Re na le dikolo tšeo di thušago go tlwaetša bagolo le batho bao ba fetšago nako e ntši ba ruta ba bangwe ka Modimo gore ba kgone go dira mošomo wa bona gabotse.

•   Modiro wa Tlhakodišo: Ge batho ba wetšwe ke dikotsi tša tlhago le tša go bakwa ke batho, re ba nea dijo, meetse le madulo. Ge re dira modiro wo re thuša batho bao ba lego tumelong e tee le rena gotee le bao e sego Dihlatse tša Jehofa.—Bagalatia 6:10.