Ka Beibeleng, lentšu la Segerika leo ka dinako tše dingwe le fetolelwago e le “kereke” le šupa go sehlopha sa barapedi, e sego moago woo go kopanelwago go wona.

Ela hloko mohlala wo: Ge moapostola Paulo a be a ngwalela Bakriste ba kua Roma, o ile a romela ditumedišo go banyalani bao ba bitšwago Akhwila le Perisila gomme a oketša ka gore: “Dumedišang le kereke yeo e kopanelago ntlong ya bona.” (Baroma 16:5, Contemporary English Version) Paulo o be a sa re gore go dumedišwe moago. Go e na le moo, o be a dumediša batho—phuthego yeo e bego e kopanela ntlong yeo. a

Ka gona go e na le gore re bitše lefelo leo re kopanelago go lona gore ke kereke, re diriša polelwana “Holo ya Mmušo.”

Polelwana ye e swanela lefelo leo ka mabaka a latelago:

• Moago ke holo, goba lefelo leo go kopanwago go lona.

• Re kopana moo go rapela Jehofa, Modimo yo go bolelwago ka yena ka Beibeleng le go nea bohlatse goba go bolela ka yena.—Psalme 83:18; Jesaya 43:12.

• Le gona re kopana gore re ithute ka Mmušo wa Modimo woo gantši Jesu a bego a bolela ka wona.—Mateo 6:9, 10; 24:14; Luka 4:43.

O ka etela Holo ya Mmušo yeo e lego kgauswi le moo o dulago gomme wa iponela ka noši kamoo Dihlatse tša Jehofa di swarago diboka tša tšona.