Dihlatse tša Jehofa di latela keletšo ya Beibele yeo e rego re se ke ra araba ditatofatšo ka moka le dikwero. Ka mohlala, seema sa ka Beibeleng se re: “Yo a phošollago mokweri o a itlhompholla.” (Diema 9:​7, 8; 26:4) Go e na le go tsenatsena dingangišanong ka baka la go tshwenyega ka ditatofatšo tša maaka, re nyaka go kgahliša Modimo.​—Psalme 119:69.

Re a tseba gore go na le “nako ya go homola le nako ya go bolela.” (Mmoledi 3:7) Re araba batho bao ba ratago go tseba nnete, gomme re phema go ngangišana ka ditaba tša go hloka mohola. Ka go dira bjalo, re latela mohlala le dithuto tša Jesu le Bakriste ba mehleng ya bogologolo.

• Jesu o ile a fo ikhomolela ge a be a latofatšwa pele ga Pilato. (Mateo 27:11-​14; 1 Petro 2:​21-​23) Le gona, Jesu o ile a fo homola ge a latofatšwa gore ke setagwa le sejagobe. Go e na le moo, o ile a dira gore batho ba lemoge gore ke motho wa mohuta mang ka ditiro tša gagwe, bjalo ka ge Beibele e bolela gore: “Bohlale bo hlatselwa ka mediro ya bjona.” (Mateo 11:19) Lega go le bjalo, maemong a mangwe ka sebete o ile a araba bao ba bego ba mo latofatša.​—Mateo 15:​1-3; Mareka 3:​22-​30.

  Jesu o ile a ruta balatedi ba gagwe gore ba se ke ba nyamišwa ke ditatofatšo tša maaka. O itše: “Go thaba lena ge batho ba le goboša le go le tlaiša gomme ba aketša ka go bolela mohuta o mongwe le o mongwe wa selo se sebe ka lena ka baka la ka.” (Mateo 5:​11, 12) Lega go le bjalo, Jesu o ile a botša balatedi ba gagwe gore ge ba latofatšwa e ka ba sebaka se sebotse sa gore ba nee bohlatse. Ka gona, ge seo se direga o tla phethagatša kholofetšo yeo e rego: “Ke tla le nea mantšu ao le tlago go a bolela gotee le bohlale tšeo baganetši ba lena ka moka ba ka se kgonego go di ganetša goba go di ngangiša.”​—Luka 21:12-​15.

• Moapostola Paulo o ile a eletša Bakriste gore ba pheme go ngangišana le baganetši ba bona ka dilo tša go se re selo, a re dingangišano tše bjalo “ga di hole selo e bile ke tša lefeela.”​—Tito 3:9; Baroma 16:17, 18.

• Moapostola Petro o ile a kgothaletša Bakriste go lwela tumelo ya bona ge go kgonega. (1 Petro 3:​15) Lega go le bjalo, o be a tseba gore gantši tsela e kaone ya go dira seo ke ka mediro, e sego ka mantšu. O ngwadile gore: “Ka go dira botse le tswalele melomo e bolelago polelo ya go hloka tsebo ya batho ba hlokago tlhaologanyo.”​—1 Petro 2:​12-​15.