Dihlatse tša Jehofa ke tše Kae Lefaseng ka Moka?

BAPALA

**Pego ya Ngwaga wa Tirelo wa** **2023** a
Palo ya Dihlatse tša Jehofa lefaseng ka moka	8 816 562
Diphuthego	118 177
Dinaga tšeo Dihlatse tša Jehofa di dirago boboledi go tšona	239

Ditho tša lena di balwa bjang?

Bao ba bolelago ditaba tše dibotse tša Mmušo wa Modimo kgwedi le kgwedi, ke bona feela bao ba balwago e le Dihlatse tša Jehofa. (Mateo 24:14) Ba akaretša Dihlatse tša Jehofa tše di kolobeditšwego le batho bao ba sego ba tšwa ba kolobetšwa eupša ba swanelega go ruta batho ba bangwe Beibele.

Na motho o swanetše go ntšha tšhelete gore e be setho sa lena?

Aowa. Go ntšha moneelo ga go tswalane felo le gore motho ke Hlatse ya Jehofa goba gore o na kabelo e itšego goba tokelo ka mokgatlong wa rena. (Ditiro 8:18-20) Ge e le gabotse, gantši meneelo yeo re e hwetšago ga go tsebje gore e ntšhitšwe ke bomang. Hlatse ya Jehofa e nngwe le e nngwe e neela ka nako, matla le tšhelete modirong wa rena wa boboledi go ithekgile ka kganyogo le maemo a motho.—2 Bakorinthe 9:7.

Le tseba bjang gore ke ba bakae bao ba rutago batho Beibele kgwedi le kgwedi?

Kgwedi le kgwedi, Dihlatse tša Jehofa di bega modiro wa tšona diphuthegong tša gabo tšona. Ga go na motho yo a gapeletšwago go iša pego ya gagwe.

Dipego tša phuthego di a kopanywa, ke moka tša romelwa ofising ya lekala yeo e hlokometšego naga yeo. Ofisi ya lekala e romela dipalomoka tša naga e nngwe le e nngwe ntlongkgolo ya rena ya lefase ka moka.

Mafelelong a ngwaga o mongwe le o mongwe wa tirelo, b go kopanywa tlhora ya palo ya Dihlatse tša Jehofa nageng e nngwe le e nngwe. Dipalo tšeo di kopanywa gotee go hwetša palo ya Dihlatse tša Jehofa lefaseng ka moka. Dipego ka botlalo tša naga e nngwe le e nngwe di gatišwa karolong yeo e rego “Lefaseng ka Moka” wepesaeteng ye. Dipego tšeo di a re kgothatša, go etša ge dipego tše di swanago le tšona di ile tša kgothatša Bakriste lekgolong la pele la mengwaga.—Ditiro 2:41; 4:4; 15:3.

Na le bala le bao ba lego ka mokgatlong wa lena eupša ba sa bolele ditaba tše dibotse?

Le ge re sa ba bale e le Dihlatse tša Jehofa, fela re a ba amogela ka diphuthegong tša rena. Ba bantši ba bona ba ba gona Segopotšong sa ngwaga le ngwaga sa lehu la Kriste, ka gona palo ya bona re kgona go e akanyetša ka go bona gore ke ba bakae bao ba bago gona Segopotšong eupša e se Dihlatse tša Jehofa. Ka 2023 bao ba bilego gona Segopotšong e bile ba 20 461 767.

Bao ba sa bego gona dibokeng tša rena ba holwa ke lenaneo la rena la mahala la thuto ya legae ya Beibele. Ka 2023, re ile ra swara dithuto tša Beibele tše 7 281 212 kgwedi le kgwedi, tše dingwe dithuto di be di swarelwa sehlopha sa batho ka nako e tee.

Ke ka baka la’ng mmušo o re palo ya lena Dihlatse tša Jehofa e godimo ge e bapetšwa le yeo lena le e bolelago?

Mmušo gantši o bala batho ka go ba botšiša gore ba bodumeding bofe. Ka mohlala, ba Lekgotla la go Balwa ga Batho la United States ba re nyakišišo ya bona “e be e nyaka go tseba gore ke ba bakae bao ba ipolelago gore ke badumedi,” gomme ba oketša ka gore dipalomoka tše ba di hweditšego “di theilwe go seo se bego se bolelwa, e sego mabakeng a kwagalago.” Ka mo go fapanego, bao ba botšago ba bangwe ditaba tše dibotse le go bega modiro woo ke bona feela bao re ba balago e le Dihlatse tša Jehofa, ga re bale bao ba no ipolelago gore ke Dihlatse tša Jehofa.

a Ngwaga wa tirelo o thoma ka September 1 go ya go August 31 ngwageng o latelago. Ka mohlala, ngwaga wa tirelo wa 2015 o thomile ka September 1, 2014 go fihla ka August 31, 2015.

b Ngwaga wa tirelo o thoma ka September 1 go ya go August 31 ngwageng o latelago. Ka mohlala, ngwaga wa tirelo wa 2015 o thomile ka September 1, 2014 go fihla ka August 31, 2015.