Ga re pheme batho bao ba kilego ba kolobetšwa ya ba Dihlatse tša Jehofa eupša gona bjale ba kgaoditše go ruta ba bangwe ka Beibele, mohlomongwe ba tlogetše le go kopanela le badumedigotee le bona. Ge e le gabotse, re ya go bona gomme ra leka go tsošološa go rata ga bona dilo tša moya.

Ga re kitimele go kgaola motho yo a dirilego sebe se segolo. Lega go le bjalo, ge e ba motho yo e lego Hlatse e kolobeditšwego a tlwaela go roba melao ya Beibele ya boitshwaro gomme a sa itshole, o tla phengwa goba a kgaolwa. Beibele e bolela ka mo go kwagalago gore: “Tlošang yo kgopo gare ga lena.”—1 Bakorinthe 5:13.

Lega go le bjalo, go thwe’ng ka monna yo a kgaotšwego eupša mosadi wa gagwe le bana bona e sa dutše e le Dihlatse tša Jehofa? Tswalano ya bodumedi yeo a bego a na le yona le lapa la gagwe e a fetoga, eupša taba ya gore ke lapa la gagwe ga e fetoge. Lenyalo la gagwe, go bontšhana lerato ka lapeng le ditirišano tša bona ga di fetoge.

Batho bao ba kgaotšwego ba sa dutše ba ka tla dibokeng tša rena. Le gona ge ba rata, ba ka newa keletšo ya Mangwalo ke bagolo ba phuthego. Morero wa bagolo ke go thuša motho yo a kgaotšwego gore a boele e be yo mongwe wa Dihlatse tša Jehofa. Batho bao ba kgaotšwego bao ba lahlago mekgwa e mebe gomme ba bontšha go tšwa pelong gore ba nyaka go phela ka melao ya Beibele, dikgoro di dula di ba bulegetše gore ba ka boela ba ba ditho tša phuthego.