Rena Dihlatse tša Jehofa re hlompha mebušo le maswao ao a emelago mebušo yeo. Re hlompha diphetho tšeo batho ba bangwe ba di dirago tša go dumediša folaga, go opela koša ya setšhaba goba go bolela mantšu a go tshepiša go botegela naga ya gabo bona.

 Eupša ga re tšee karolo meletlong yeo, ka gobane re dumela gore ga e dumelelane le seo Beibele e se rutago. Re a thaba ge batho ba bangwe ba hlompha ditumelo tša rena go no swana le ge rena re hlompha tša bona.

Sehlogong se re tlo kwa gore:

•  Ke melao efe ya motheo ya Beibele yeo e ka re hlahlago?

•  Re swanetše go dira eng ge e ba go e na le molao wo o rego re swanetše go tšea karolo meletlong ya botšhaba goba ya dipolotiki?

•  Na Dihlatse tša Jehofa di tšea karolo dipolotiking goba ditabeng tša setšhaba?

 Melao ye e mebedi ya motheo ya Beibele e re thuša go dira diphetho:

•   Re swanetše go rapela Modimo a nnoši. Beibele e re: “Ke Jehofa Modimo wa gago yo o swanetšego go mo rapela, e bile ke yena a nnoši yo o swanetšego go mo direla tirelo e kgethwa.” (Luka 4:8) Mantšu ao a lego košeng ya setšhaba le ao motho a a bolelago a go tshepiša gore o tlo botegela naga, a bontšha gore o rata naga ya gabo go feta dilo ka moka. Ka gona Dihlatse tša Jehofa di bona e le phošo go tšea karolo meletlong e bjalo.

   Ka mo go swanago Dihlatse tša Jehofa di bona go dumediša folaga e le tiro ya borapedi goba go rapela medingwana, e lego selo seo Beibele e sa se dumelego. (1 Bakorinthe 10:14) Boradihistori ba bangwe ba re difolaga tša dinaga ge e le gabotse ke maswao a bodumedi. Radihistori yo a bitšwago Carlton J. Hayes a o ngwadile gore: “Botšhaba bo swana le bodumedi bjoo leswao la bjona le legolo le modingwana wa bjona e lego folaga.” Mongwadi yo a bitšwago Daniel P. Mannix ge a bolela ka Bakriste ba pele o re o lemogile gore: “Bakriste ba ile ba gana go . . . direla morongwa yo a šireletšago mmuši [wa Roma] dihlabelo—e lego selo seo lehono se swanago le go dumediša folaga.” b

  Le ge Dihlatse tša Jehofa di sa dumediše folaga, di ka se ke tša e senya, tša e fiša goba go e nyatša. E bile ga di nyatše maswao a dinaga tše dingwe.

•   Go Modimo batho ka moka ba a lekana. (Ditiro 10:34, 35) Beibele e re: “Go tšwa mothong o tee [Modimo] o dirile setšhaba se sengwe le se sengwe sa batho.” (Ditiro 17:26) Ka baka leo, Dihlatse tša Jehofa di dumela gore ke phošo go hlompha batho ba morafo o itšego goba setšhaba se itšego kudu go feta ba bangwe. Re hlompha batho ka moka go sa šetšwe gore ba tšwa kae goba ba dula kae.—1 Petro 2:17.

 Dihlatse tša Jehofa ga di lwe le mebušo. Re dumela gore mebušo yeo e lego gona ke karolo ya thulaganyo yeo Modimo a e dumeletšego. (Baroma 13:1-7) E bile re dumela gore Bakriste ba swanetše go kwa babuši.—Luka 20:25.

 Re swanetše go dira eng ge e ba molao wa mmušo o re kgopela go dira selo seo Modimo a sa se nyakego? Ge go kgonega, ka dinako tše dingwe re ka ngwalela mmušo gomme ra kgopela gore o fetoše melao yeo. c Ge go sa kgonege gore mmušo o fetoše melao yeo, gona Dihlatse tša Jehofa ka tlhompho di tla kgetha go kwa Modimo e le mmuši go e na le go kwa batho.—Ditiro 5:29.

 Aowa. Dihlatse tša Jehofa ga di tšee karolo dipolotiking goba ditabeng tša setšhaba. Taba ya gore ga re dumediše folaga, ga re opele koša ya setšhaba goba go bolela mantšu a go tshepiša go botegela naga ya gabo rena, ga e bolele gore re lwantšhana le mebušo. Go e na le moo re latela seo Beibele e se bolelago ka meletlo yeo.