Maaka: Dihlatse tša Jehofa ga di keteke Easter ka gore ga se Bakriste.

Therešo: Re dumela gore Jesu Kriste ke Mophološi wa rena, e bile re dira sohle seo re ka se kgonago gore re “latele dikgato tša gagwe kgauswi.”—1 Petro 2:21; Luka 2:11.

Maaka: Ga le dumele gore Jesu o tsošitšwe bahung.

Therešo: Re dumela tsogong ya Jesu; re a kwešiša gore ke ya bohlokwa kudu tumelong ya Mokriste e bile re bolela ka yona kudu ge re ruta ba bangwe Beibele.—1 Bakorinthe 15:3, 4, 12-15.

Maaka: Ga le na taba le gore bana ba lena ba fetwa ke monate wa go keteka letšatši la maikhutšo la Easter.

Therešo: Re rata bana ba rena—re dira sohle seo re ka se kgonago go ba ruta le go ba thuša e le gore ba thabe.—Tito 2:4.

• Go keteka letšatši la maikhutšo la Easter ga se gwa thewa Beibeleng.

• Jesu o laetše gore re gopole lehu la gagwe e sego tsogo ya gagwe. Re ba gona Segopotšong sa lehu la gagwe ngwaga le ngwaga ka letšatši leo a hwilego ka lona go ya ka khalentara ya Beibele.—Luka 22:19, 20.

• Re dumela gore metlwae ya Easter yeo e thomilego meletlong ya bogologolo ya pelego, ga e kgahliše Modimo. Modimo o nyaka gore re mo nee “boineelo bjo bo feletšego,” e bile ga a kgahlišwe ke borapedi bjoo bo nago le metlwae yeo a sa e amogelego.—Ekisodo 20:5; 1 Dikgoši 18:21.

Re dumela gore phetho ya rena ya go se keteke Easter e theilwe ka go tia Beibeleng, yeo e re kgothaletšago gore re diriše “bohlale le tlhaologanyo” go e na le go fo latela ditlwaelo tša batho. (Diema 3:21; Mateo 15:3) Ge re dutše re botša ba bangwe ka ditumelo tša rena mabapi le Easter ge ba re botšiša, re boetše re hlompha phetho yeo motho yo mongwe le yo mongwe a e dirago ka taba ye.—1 Petro 3:15.