Ka ge re le Dihlatse tša Jehofa, re šoma ka thata gore re age malapa a rena le a baagišani ba rena. Re hlompha Modimo ka ge e le Mothomi wa lapa. (Genesi 2:21-24; Baefeso 3:14, 15) A diriša Beibele, Modimo o re ruta melao ya motheo yeo e thušitšego batho lefaseng ka bophara go ba le manyalo a tiilego le a thabilego.

Re dira sohle seo re ka se kgonago gore re latele keletšo ya Beibele, ka ge e re thuša gore re be banna ba nyetšego, basadi ba nyetšwego le batswadi ba kaone. (Diema 31:10-31; Baefeso 5:22–6:4; 1 Timotheo 5:8) Bohlale bjo bo tšwago ka Beibeleng bo thuša le malapa ao a aroganego ka bodumedi gore a atlege. (1 Petro 3:1, 2) Ela hloko seo se bolelwago ke batho bao e sego Dihlatse bao balekane ba bona e lego Dihlatse tša Jehofa:

• “Mengwaga ya rena e tshelelago ya mathomo re le lenyalong e be e tletše ka diphapano le pherekano. Lega go le bjalo, ka morago ga gore Ivete e be Hlatse ya Jehofa, o ile a thoma go ba le lerato le tseneletšego le go se fele pelo. Diphetogo tšeo a di dirilego di phološitše lenyalo la rena.”—Clauir yo a tšwago Brazil.

• “Ge monna wa ka, Chansa, a thoma go ithuta Beibele le Dihlatse tša Jehofa, ke ile ka gana ka gobane ke be ke nagana gore di thuba malapa. Ga e sa le go tloga ka nako yeo, ke bone gore ge e le gabotse Beibele e thušitše lenyalo la rena.”—Agness yo a tšwago Zambia.

Ge re le bodireding, re bontšha baagišani ba rena kamoo go diriša bohlale bjo bo tšwago ka Beibeleng bo ka ba thušago go

• Kgetha molekane wa lenyalo ka bohlale

• Atlega ngwageng wa mathomo wa lenyalo

• Dirišana le mmatswale le ratswale

• Laola tšhelete

• Kgaotša go ngangišana

• Ba yo a lebalelago

• Laya bana

Ke therešo gore ka dinako tše dingwe go ka dira gore go be le diphapano. Ka mohlala, pego ya 1998 yeo e dirilwego ke khamphani ya go dira nyakišišo e lego Sofres, e hweditše gore lenyalong le tee go a 20 go ba le mathata a magolo ge molekane o tee a fetoga Hlatse.

Jesu o boletše gore bao ba latelago dithuto tša gagwe ka dinako tše dingwe ba be ba tla le ba le diphapano ka lapeng. (Mateo 10:32-36) Radihistori Will Durant o boletše gore Mmušong wa Roma, “Bokriste bo be bo latofatšwa ka gore bo thuba malapa,” a le lehono Dihlatse tša Jehofa le tšona di sa latofatšwa ka tsela e swanago. Lega go le bjalo, na se se ra gore Dihlatse di baka diphapano malapeng?

Ge Kgoro ya Yuropa ya Ditokelo tša Batho e be e dira phetho ya mabapi le tatofatšo ya gore Dihlatse tša Jehofa di thuba malapa, e boletše gore batho bao e sego Dihlatse gantši ke bona bao ba bakago diphapano ka go gana go “amogela le go hlompha tokologo ya bodumedi ya molekane wa bona le go mo dumelela go dira mediro ya gagwe ya bodumedi.” Kgoro e okeditše ka gore: “Boemo bjo bo tlwaelegile manyalong ao balekane ba lego bodumeding bjo bo sa swanego e bile Dihlatse tša Jehofa le tšona di lebane le boemo bjo bo swanago.” b Lega go le bjalo, gaešita le ge Dihlatse tša Jehofa di lebane le tlaišo ya bodumedi, di katanela go latela keletšo ya Beibele e rego: “Le se ke la bušetša bobe ka bobe. .... Ge e ba go kgonega, go fihla moo go ithekgilego ka lena, ebang le khutšo le batho bohle.”—Baroma 12:17, 18.

Dihlatse di kwa taelo ya Beibele ya go nyala goba go nyalwa “feela Moreneng,” seo se ra gore go nyalana le motho yo a lego bodumeding bjo tee le tšona. (1 Bakorinthe 7:39) Taelo ye e theilwe ka Beibeleng e bile e a hola. Ka mohlala, sehlogo sa 2010 seo se lego go Journal of Marriage and Family se bontšha gore “balekane bao ba lego bodumeding bjo tee, bao mekgwa le ditumelo tša bona di swanago, gantši ba tšeela godimo ditswalano tša bona. c

Lega go le bjalo, Dihlatse ga di kgothaletše ditho tša tšona gore di arogane le balekane ba tšona bao e sego Dihlatse. Beibele e re: “Ge e ba ngwanabo rena a na le mosadi yo a sa dumelego gomme mosadi yoo a dumela go dula le yena, a se ke a mo tlogela; le gona ge e ba mosadi yo a nago le monna yo a sa dumelego gomme a dumela go dula le yena, a se ke a tlogela monna wa gagwe.” (1 Bakorinthe 7:12, 13) Dihlatse tša Jehofa di kwa taelo ye.