Dihlatse tša Jehofa ga di keteke matšatši a matswalo ka ge re dumela gore menyanya e bjalo ga e thabiše Modimo. Le ge Beibele e sa bolele ka go lebanya gore re se keteke matšatši a matswalo, e re thuša go kwešiša dintlha tša bohlokwa ka matšatši a le go kwešiša pono ya Modimo ka ona. Ela hloko dintlha tše nne le melao ya motheo ya Beibele yeo e tswalanago le tšona.

1. Go keteka matšatši a matswalo go thomile boheiteneng. Go ya ka puku ya Funk & Wagnalls Standard Dictionary of Folklore, Mythology, and Legend, menyanya ye e be e etšwa tumelong ya gore ka letšatši la motho la matswalo, “meoya e mebe le ditutuetšo tše mpe di ka kgona go hlasela yo a ketekago” le gore “go ba gona ga bagwera le go mo lakaletša mahlatse go šireletša yo a ketekago.” Puku ya The Lore of Birthdays e boletše gore mehleng ya bogologolo go bolokwa ga dipego tša matšatši a matswalo go be go le “bohlokwa bakeng sa go bopa dinaledi tša matswalo” e lego selo seo se bego se theilwe “tsebong ya balepi ba dinaledi.” Puku ye e oketša ka gore: “Dikgantlele tša letšatši la matswalo ka go ya ka tumelo ya bona, di be di bewa ka mohlolo o kgethegilego wa go nea mahlatse.”

   Beibele e ganetšana la go dirišwa ga malea, bonoge, meoya, goba “selo le ge e le sefe se se swanago le se.” (Doiteronomio 18:14; Bagalatia 5:19-21) Ge e le gabotse, lebaka le tee leo Modimo a ilego a fediša motse wa kgale wa Babele ke gore badudi ba wona ba be ba diriša bolepi bja dinaledi e lego mokgwa o mongwe wa bonoge. (Jesaya 47:11-15) Dihlatse tša Jehofa ga di a tshwenyega ka go tseba setlogo sa motlwae o mongwe le o mongwe; eupša ge Mangwalo a nea tlhahlo e kwagalago, ga re iphoufaletše yona.

2. Bakriste ba lekgolong la pele la ngwaga ga se ba ka ba keteka menyanya ya matswalo. The World Book Encyclopedia e bolela gore: “ba be ba lebelela go ketekwa ga matswalo a motho le ge e le ofe e le moetlo wa baheitene.” Beibele e bontšha gore baapostola le ba bangwe bao ba bego ba rutwa ke Jesu ba ile ba bea mohlala wo Bakriste ka moka ba swanetšego go o latela.—2 Bathesalonika 3:6.

3. Monyanya o tee wo Bakriste ba letetšwego go o keteka o akaretša, lehu e sego letšatši la matswalo—e lego lehu la Jesu. (Luka 22:17-20) Se ga se makatše ka gobane Beibele e bolela gore “letšatši la go hwa ga motho le phala letšatši la go belegwa ga gagwe.” (Mmoledi 7:1) Mafelelong a bophelo bja gagwe bja mo lefaseng, Jesu o ile a itirela leina le lebotse le Modimo, a dira letšatši la go hwa ga gagwe gore e be la bohlokwa go feta la go belegwa ga gagwe.—Baheberu 1:4.

4. Beibele ga se ya ka ya bolela ka mohlanka wa Modimo yo a kilego a keteka letšatši la matswalo. Se ga se sa dirwa ka phošo, ka ge Beibele e bega menyanya e mebedi ya matswalo ya batho bao ba bego ba sa hlankele Modimo. Lega go le bjalo, menyanya ye ka bobedi ga e bolelwe gabotse.—Genesi 40:20-22; Mareka 6:21-29.

Go swana le batswadi ka moka bao ba lokilego, batswadi ba Dihlatse le bona ba bontšha lerato baneng ba bona ngwaga ka moka, go akaretša go ba nea dimpho gaešita le go ba le dipokano tše di thabišago le bona. Ba leka go latela mohlala o phethagetšego wa Modimo, yo ka lerato a neago bana ba gagwe dilo tše dibotse. (Mateo 7:11) Bana ba Dihlatse ga ba ikwe ba tingwa se sengwe ka ge go bontšhwa ka seo ba se bolelago ka mo tlase:

• “Go thabiša kudu go hwetša mpho ka nako yeo o bego o sa e letela.”—Tammy, wa mengwaga e 12.

• “Le ge ke sa hwetše mpho ka letšatši laka la matswalo, batswadi baka ba sa dula ba nthekela dimpho le ka matšatši a mangwe. Ke rata seo kudu ka ge di etla ke sa letela.”—Gregory, wa mengwaga e 11.

• “O nagana gore metsotso e lesome, dikukunyana tše mmalwa, le koša di dira monyanya? Ge o nyaka go bona gore monyanya wa kgonthe ke eng o tle gagešo!”—Eric,wa mengwaga e 6.