Mokgatlo wa Watch Tower Bible and Tract Society of Pennsylvania ke mokgatlo wo o sa dirego letseno woo o hlomilwego ka 1884 ka tlase ga melao ya Commonwealth of Pennsylvania, U.S.A. O dirišwa ke Dihlatse tša Jehofa bakeng sa go thekga modiro wa tšona wa lefase ka bophara, wo o akaretšago go gatiša Dibeibele, dipuku le dipukwana tšeo di theilwego Beibeleng.

Merero ya mokgatlo wo ke “go dira mediro ya bodumedi, go ruta le go thuša,” kudukudu ke “go bolela le go ruta ebangedi ya Mmušo wa Modimo ka taelo ya Kriste Jesu.” Bao ba hlankelago mokgatlong ba tla ka taletšo feela e sego ka gore motho o neela gakaakang. Ditho tša mokgatlo wo gotee le bahlahli ba wona ba thuša Sehlopha se Bušago sa Dihlatse tša Jehofa.

Ntle le mokgatlo wa Watch Tower Bible and Tract Society of Pennsylvania, Dihlatse tša Jehofa di diriša mekgatlo ya molao e mentši dinageng tše fapafapanego. E mengwe ya mekgatlo ye e akaretša “Watch Tower,” “Watchtower,” goba tsela e nngwe yeo maina a dirišwago ka yona.

Mekgatlo ye ya molao e re thušitše go phetha dilo tše dintši ga e sa le e hlongwa, bjalo ka:

• Go ngwala le go gatiša. Re šetše re gatišitše Dibeibele tše dimilione tše 220 gotee le dipuku le dipukwana tšeo di theilwego Beibeleng tše dibilione tše 40, ka maleme a fetago 700. Wepesaete ya jw.org e dira gore batho ba kgone go bala Beibele inthaneteng mahala ka maleme a fetago a 120 le go hwetša dikarabo tša dipotšišo tša Beibele tše bjalo ka “Mmušo wa Modimo ke Eng?”

• Go ruta. Re swara dikolo tša go fapafapana tša go ithuta Beibele. Ka mohlala go tloga ka 1943, Dihlatse tša Jehofa tše fetago 8 000 di ile tša holwa ke tlwaetšo ya Sekolo sa Beibele sa Watchtower sa Gilead, seo se di thušitšego go hlankela e le baromiwa goba go tšwetša pele le go matlafatša modiro wa rena wa lefase ka bophara. Beke e nngwe le e nngwe, batho ba dimilione go akaretša le bao e sego Dihlatse ba a rutwa dibokeng tša diphuthego tša rena. Re swara gape le diklase tša go ruta batho go bala le go ngwala le go gatiša puku yeo e rutago batho go bala le go ngwala ka maleme a 110.

• Go thuša. Re ile ra nea batho bao ba wetšwego ke mathata dilo tšeo ba di hlokago—go sa šetšwe gore ba wetšwe ke dikotsi tšeo di bakwago ke batho go swana le nageng ya Rwanda nakong ya dipolao tša molokwanarite ka 1994 goba dikotsi tša tlhago go swana le tšhišinyego ya lefase ya 2010 nageng ya Haiti.

Le ge mekgatlo ye le mekgatlo ya molao yeo re e dirišago e fihleletše dilo tše dintši, modiro wa rena wa go bolela ka Beibele ga se wa ithekga ka mekgatlo ye. Mokriste yo mongwe le yo mongwe o na le boikarabelo bja go phethagatša thomo yeo re e neilwego ke Modimo ya go bolela le go ruta ditaba tše dibotse. (Mateo 24:14; 28:19, 20) Re dumela gore Modimo o thekga modiro wa rena le gore o tla tšwela pele a ‘godiša’—1 Bakorinthe 3:6, 7.