Aowa, Dihlatse tša Jehofa ga di ntšhe sa lesome; modiro wa rena o thekgwa ka meneelo ya boithatelo yeo go sa bolelwego gore e tšwa go bomang. Go ntšha sa lesome ke eng, gona ke ka baka la’ng Dihlatse tša Jehofa di sa ntšhe sa lesome?

Taelo ya gore motho a ntšhe sa lesome goba karolo ya lesome ya dilo tšeo a nago le tšona e be e le karolo ya Molao wo o bego o neilwe setšhaba sa bogologolo sa Isiraele. Lega go le bjalo, Beibele e bolela ka mo go kwagalago gore Molao wo—go akaretša le ‘taelo ya go kgoboketša dikarolo tša lesome’—ga o šome go Bakriste.—Baheberu 7:5, 18; Bakolose 2:13, 14.

Go e na le go ntšha sa lesome le go neela dibego, Dihlatse tša Jehofa di ekiša Bakriste ba lekgolong la pele la nywaga ka go thekga bodiredi bja tšona ka ditsela tše tše pedi: ka go ruta batho Beibele mahala le ka go ntšha meneelo ya boithatelo.

Ka go re’alo re latela seo Beibele e se laetšego Bakriste ka gore: “Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.”—2 Bakorinthe 9:7.