Sehlopha se Bušago ke sehlopha se senyenyane sa Bakriste ba godilego ka tsebo seo se hlahlago Dihlatse tša Jehofa lefaseng ka moka. Mešomo ya bona e mebedi e bohlokwa e akaretša:

•   Go okamela le go lokišeletša dipuku le dipukwana tšeo di theilwego Beibeleng, go lokišeletša diboka le dikolo tša Dihlatse tša Jehofa.—Luka 12:42.

•   Go okamela modiro wa Dihlatse tša Jehofa ka go hlahla modiro wa rena wa boboledi, go hlokomela tsela yeo dithoto tšeo di neetšwego di dirišwago ka yona.

 Sehlopha se Bušago se latela tsela yeo e bego e dirišwa ke “baapostola le bagolo Jerusalema” lekgolong la pele, bao ba bego ba dira diphetho tše bohlokwa legatong la phuthego ya Bokriste. (Ditiro 15:2) Go swana le banna ba ba botegago, ditho tša Sehlopha se Bušago ga se baetapele ba mokgatlo wa rena. Ba latela tlhahlo ya Beibele le go tseba gore Jehofa Modimo o kgethile Jesu Kriste go ba Hlogo ya phuthego.—1 Bakorinthe 11:3; Baefeso 5:23.

 Ditho tša Sehlopha se Bušago ke Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane le Jeffrey Winder. Ba hlankela ntlongkgolo ya rena ya lefase ka bophara kua Warwick, New York, U.S.A.

 Sehlopha se Bušago se hlomile dikomiti tše tshela tša go okamela mediro ya rena e fapafapanego, gomme setho se sengwe le se sengwe se hlankela komiting e tee goba go feta moo.

•   Komiti ya Balomaganyi: E hlokomela ditaba tša molao le go thuša ge go ena le dikotsi, go thuša ditabeng tša ge Dihlatse di tlaišwa ka baka la tumelo ya tšona le go rarolla ditaba tše dingwe tše di lego bohlokwa tša Dihlatse tša Jehofa.

•   Komiti ya Bašomi: E hlokomela dithulaganyo tšeo di dirwago bakeng sa ditho tša lapa la Bethele.

•   Komiti ya Kgatišo: E hlokomela go tšweletšwa le go romelwa ga dipuku le dipukwana tša Beibele, go agwa ga mafelo a borapedi, diofisi tša bofetoledi le diofisi tša makala.

•   Komiti ya Tirelo: E hlokomela modiro wa rena wa go bolela “Ditaba tše tše dibotse tša Mmušo.”—Mateo 24:14.

•   Komiti ya go Ruta: E hlahla le go lokišetša mananeo a go ithuta Beibele ao re a hwetšago dibokeng, dikolong, mananeong ao a theetšwago le dibidiong.

•   Komiti ya Bongwadi: E hlahla le go lokišetša mananeo a go ithuta Beibele ao a gatišwago le ao a hwetšwago wepesaeteng ya rena, gape komiti ye e hlokomela le modiro wa bofetoledi.

 Godimo ga mediro yeo Sehlopha se Bušago se e dirago ka dikomiti tše, se kopana beke le beke go boledišana ka dinyakwa tša mokgatlo. Dibokeng tše, ditho tše di ahlaahla seo Mangwalo a se bolelago gomme di dumelela moya o mokgethwa wa Modimo gore o di hlahle ge di katanela go dumelelana ka phetho e tee.—Ditiro 15:25.

 Ke Bakriste ba botegago bao ba thušago dikomiting tša Sehlopha se Bušago. (1 Bakorinthe 4:2) Ba na le bokgoni le phihlelo modirong wo o hlokometšwego ke dikomiti tšeo ba šomago go tšona ebile ba ba gona dibokeng tšeo di swarwago beke le beke tša dikomiti tše. Le ge ba sa tšee karolo ge go dirwa diphetho, bathuši ba nea keletšo yeo e tšeelwago godimo le tsebišo yeo e nyakegago, ba diriša seo dikomiti di dumelelanego ka sona le go bona tšwelopele ya seo di phethilego ka sona. Sehlopha se Bušago se ka ba abela go etela bana babo rena dikarolong tše fapanego tša lefase goba go nea dipolelo ditiragalong tša go swana le diboka tša ngwaga le ngwaga goba meletlong ya go aloga sekolong sa Gilead.