Aowa. Dihlatse tša Jehofa di dumela gore Modimo o bopile dilo ka moka. Eupša ga di dumelelane le dilo ka moka tšeo batho bao ba dumelago thutong ye ba di bolelago. Lebaka? Ka baka la gore dikgopolo tše dintši tša thuto ye di ganetšana le Beibele. Ela hloko mehlala e mebedi e latelago:

1. Botelele bja matšatši a tshelelago a tlholo. Batho bao ba dumelago thutong ye ba bolela gore matšatši a tshelelago a tlholo a be a na le diiri tše 24. Eupša lentšu “letšatši” ka Beibeleng le ka bolela ka nako e telele.—Genesi 2:4; Psalme 90:4.

2. Nako yeo lefase le bilego gona ka yona. Batho ba bangwe bao ba dumelago thutong ye ba ruta gore lefase le na le nywaga e sego kae e dikete le le gona. Lega go le bjalo, go ya ka Beibele, lefase le legohle di bile gona pele ga matšatši a tshelelago a tlholo. (Genesi 1:1) Ka baka leo, Dihlatse tša Jehofa ga di ganetšane le nyakišišo ya borathutamahlale bao ba bolelago gore lefase le na le nywaga e dibilione le le gona.

Gaešita le ge rena Dihlatse tša Jehofa re dumela tlholong, ga re ganetšane le thutamahlale. Re dumela gore thutamahlale le Beibele di a dumelelana.