Dikhilomithara tše di ka bago tše 145 ka leboa la New York City, kgauswi le motse o monyenyane wa Wallkill, kua New York, go na le dipolasa tše mmalwa tšeo di kgathilego tema e bohlokwa thutong ya Beibele ya lefase ka bophara ya Dihlatse tša Jehofa. Polasa ya mathomo ya Watchtower, ka ge mafelo ao a tsebega bjalo, e rekilwe mengwageng e 50 e fetilego, ka January 2, 1963.

David Walker, e lego yo mongwe wa Dihlatse tša Jehofa yo ga e sa le a šoma Wallkill go tloga mathomong a yona, o re botša lebaka leo polasa ya mathomo e rekilwego, o re: “Palo ya batho bao ba šomago Ntlongkgolo ya Dihlatse tša Jehofa kua Brooklyn, New York, e be e dutše e gola gomme re be re nyaka go fepa batho bao ka tsela e sa bitšego kudu. Dilo tšeo di bego di tšweletšwa polaseng e nngwe yeo Dihlatse tša Jehofa di bego di e diriša kua leboa la New York di be di tšea diiri tše tshelelago go ya go tše seswai gore di fihle mo Brooklyn. Wallkill e be e le bokgole bja diiri tše pedi feela. Le ruri e ile ya ba lefelo le lekaone la go kgotsofatša dinyakwa tša rena.” Mafelelong, Dihlatse tša Jehofa di ile tša diriša polasa ye go bjala dienywa le merogo le go tšweletša nama ya kgogo, ya kolobe le ya kgomo gotee le ditšweletšwa tša maswi. Ge nako e dutše e eya, go ile gwa oketšwa ka dipolasa tše dingwe.

Ka nako ya mengwaga e lesome, go oketšega ga palo ya Dihlatse tša Jehofa go ile gwa dira gore go be le dikaonefatšo tše dikgolo kua Wallkill. Go tlaleletša go dienywa tšeo di ka bunwago, go ile gwa tšweletšwa dikgatišo tšeo di bego di ka thuša ka modiro wa puno ya seswantšhetšo woo Jesu a boletšego ka wona. (Mateo 9:37; Luka 10:2; Johane 4:35, 36) Ela hloko e mengwe ya mediro yeo e bego e dutše e dirwa kua Wallkill.

Go gatiša: Magareng ga bo-1901 go ya go bo-2000, lefelo la go gatiša leo le lego kua Brooklyn, New York, le be le tšweletša dikgatišo tše dintši tšeo di theilwego Beibeleng. Eupša ge dikgatišo di thoma go nyakega kudu, lefelo la go gatiša la Brooklyn le be le sa kgone go fihlelela dinyakwa tšeo ka moka. Ka gona, ka 1973, Dihlatse tša Jehofa di ile tša fetša go aga lefelo le lefsa la go gatiša kua Wallkill. Ga e sa le go tloga ka nako yeo, meago yeo e lego moo go gatišetšwago e ile ya katološwa ka makga a mmalwa, la mafelelo e be e le ka 2004.

Thekinolotši ya Khomphutha: Ka 1979, sehlopha sa Dihlatse tša Jehofa kua Wallkill se ile tša thoma go hlama lenaneo le lefsa la khomphutha, leo ga bjale le tsebjago e le Multilanguage Electronic Publishing System (MEPS). Sedirišwa se se thušitše gore dikgatišo tšeo di theilwego Beibeleng di tšweletšwe ka maleme a ka godimo ga a 600.

Thuto: Ka 1988, Sekolo sa Beibele sa Watchtower sa Gilead se ile sa tlošwa Brooklyn ke moka sa išwa Wallkill, gomme ka October 17, diklase di ile tša thoma. Sekolo seo ga e sa le se le moo go fihlela ge se išwa Watchtower Educational Center kua Patterson, New York, ka April 1995.

Go etša dipolasa tše dingwe, mengwageng e masome a mahlano e fetilego, mekgwa le go dirišwa ga Dipolasa tša Watchtower go fetogile. Lega go le bjalo, go dirilwe maiteko a magolo a go tšweletša dijo tše di kaone go Dihlatse tša Jehofa tšeo di šomago meagong ya Bethele kua U.S. New York.

Ga bjale Dihlatse tša Jehofa kua Wallkill di aga diofisi, lefelo la bodulo le meago e mengwe e mefsa ya tlaleletšo. Le gona di mpshafatša meago ya tšona. Mešomo ye ka moka e thuša Dipolasa tša Watchtower go tšwela pele di hlokomela dinyakwa tša moya tša palo e golago ya batho bao ba fetogago Dihlatse tša Jehofa karolong ye ya lefase.

David Walker, yoo a tsopotšwego pejana, o re: “Ka mengwaga e fetago e 50, ke bile le lethabo le legolo go bona tsela yeo meago e menyenyane ya Wallkill e gotšego ka yona le go kgatha tema e bohlokwa kgolong ya lefase ka bophara ya go ruta batho molaetša wa Beibele!”