Lefelo leo o ka bonago histori ya Dihlatse tša Jehofa o sa hlahlwe ke motho le butšwe ka October 2012 ntlongkgolo ya rena ya lefase kua Brooklyn, New York. a Diswantšho tšeo di lego moo di bontšha tlaišego, dikotsi gotee le diphenyo tša batho ba bangwe bao ba bego ba nyaka go phela e le Bakriste.

Baeng ba bona histori ya nywaga e mentši, go thoma ka mehla ya Bakriste ka 33 C.E. go fihla le lehono. Diswantšho tšeo tša histori di rulagantšwe ka dikarolo tše nne tšeo di bontšhago nywaga yeo e kgomaganyago dikarolo tšeo. Karolo e nngwe le e nngwe e na le sehlogo seo se theilwego Mangwalong gomme e thoma ka bidio e kopana yeo e ka theetšwago ka Seisemane e bile e na le mantšu a fetoletšwego ka maleme a mangwe a tshelelago—Sefora, Sejapane, Sekorea, Sepanishi, Sepotokisi le Setaliana.

Sehlogo sa karolo ya mathomo se theilwe mantšung a Jesu ao a lego go Johane 3:19 gomme se re: “Batho ba Ratile Leswiswi.” Beibele e boletše e sa le pele gore batho ba kgopo ba tla ‘tsoga gomme ba bolela dilo tše di kgopamego.’ (Ditiro 20:30) O tla gopotšwa ka ditiro tša banna ba bjalo ge o lebelela tatelano ya ditiragalo.

Sehlogo sa karolo ya bobedi se na le polelwana yeo e dirišitšwego go 2 Bakorinthe 4:6 gomme se re: “Seetša a se Bonege.” Tatelano ya ditiragalo ke ya nywaga ya go tloga mafelelong a bo-1800 go ya mathomong a bo-1900. Karolo ye e thoma ka kanegelo ya banna bao ba ikemišeditšego bao ba ilego ba thoma fase go ithuta Mangwalo e bile e re botša kamoo ba ilego ba gola tsebong le palo ya bona ya oketšega pele ga Ntwa ya Pele ya Lefase.

Karolwana e latelago ya karolo ye ya bobedi e bontšha filimi e tumilego kudu ya “Photo-Drama of Creation.” Ka 1914, Barutwana ba Beibele (ka ge Dihlatse tša Jehofa di be di tsebja bjalo ka nako yeo) ba ile ba thoma go bontšha batho filimi ye ya moswananoši, yeo e bego e kopantše diswantšho tše di emego le tše di sepelago gomme o kgona go kwa le mantšu ao a rekhotilwego. Nywageng ya ka morago ga gore e lokollwe, batho ba dimilione ba ile ba kgeregela go tlo bona filimi ye. Diswantšhong tšeo tša histori go na le tše dingwe tša diswantšho tša mathomong tša filimi ye, bidio e kopana yeo e rolago filimi yeo le di-slide tša mebala tša ka godimo ga tše 500.

Sehlogo sa karolo ya boraro se tšerwe go Kutollo 12:17 gomme se re: “Drakone ya Galefa.” Karolo ye e bolela ka go tlaišwa ga balatedi ba Kriste mathomong a lekgolo la bo-20 la nywaga e bile e na le dipego tše di kgomago tša Bakriste bao ba ilego ba dula ba sa tšee lehlakore nakong ya ntwa. Bidio e nngwe e kopana e bontšha pego ya Remigio Cuminetti, e lego Hlatse yeo e ilego ya gana go apara diaparo tša mašole a Italy goba go lwa Ntweng ya Pele ya Lefase. E nngwe e bolela ka Alois Moser wa kua Austria. O ile a gana gore, “Heil Hitler!” gomme ka baka la seo a lahlegelwa ke mošomo ke moka mafelelong a lahlelwa kampeng ya tshwenyo ya Dachau.

Sele ya maitirelo yeo e lego leswiswi e bontšha seo Dihlatse tša Jehofa di ilego tša lebeletšana le sona ge di be di golegilwe ka baka la tumelo ya tšona dinageng tše bjalo ka Gerika, Japane, Poland le Serbia.

Karolo ya mafelelo e na le sehlogo se se rego: “Ditaba tše Dibotse go Ditšhaba Tšohle,” seo se theilwego go Mateo 24:14 gomme e hlalosa mediro ya Dihlatse tša Jehofa go tloga ka 1950 go fihla gona bjale. Go na le diswantšho tše di kgobokeditšwego tšeo di bontšhago go oketšega ka lebelo, go phegelela modirong wa boboledi le lerato la borwarre e lego dilo tšeo Dihlatse tša Jehofa di tsebjago ka tšona.

Pele moeng a tloga lefelong leo la histori, a ka ya mafelwaneng a itšego ao a lego moo go ithuta ka Ntlo ya Beibele le Taberenakele ya Brooklyn, e lego meago yeo e ilego ya dirišwa ke Dihlatse tša Jehofa nywaga ya ka godimo ga e 100 e fetilego.

Go tšere ngwaga go rulaganya lefelo le gotee le dikgwedi tše dintši gore le agiwe. Dihlatse go tšwa lefaseng ka moka di ile tša neela dilo tšeo di bego di di lebelela e le bohwa bjo bohlokwa.

Ke ka baka la’ng go ile gwa dirwa modiro wo ka moka? Ge yo mongwe wa ditho tša Sehlopha se Bušago sa Dihlatse tša Jehofa a be a botšišwa gore Dihlatse tša Jehofa di tla holega ka eng ka go tlo bona lefelo le la histori, o ile a boeletša mantšu a tsebjago kudu a rego: “Gore re tsebe moo re yago gona, re swanetše go tseba mo re tšwago.”