Kua Jeremane go na le Basinti le Baromani ba bantši kudu. a Matšatši’a Dihlatse tša Jehofa di dira dipampišana, diporoutšha le dibidio tšeo di theilwego Beibeleng ka leleme la bona la Seromani. b

Ka September le October 2016, Dihlatse tša Jehofa di be di swaregile ka go botša Basinti le Baromani ditaba tša Beibele ka Seromani. Di be di etetše ditoropong tša go fapafapana tša Jeremane go akaretša Berlin, Bremerhaven, Freiburg, Hamburg, le Heidelberg. Le gona, Dihlatse di ile tša rulaganya gore go be le diboka tša Seromani Diholong tša tšona tša Mmušo.

Basinti le Baromani ba bantši ba be ba maketše e bile ba thabile kudu ge ba be ba bona Dihlatse di ba etetše. Andre le mosadi’agwe Esther bao le bona ba bego ba etetše moo, ba itše: “Batho ba be ba thabile kudu gore re dirile maiteko a magolo go ba etela. Ba bantši ba be ba thabile kudu ge ba ekwa le go bala molaetša wa Beibele ka segagabo bona. Ge mosetsana yo mongwe a be a lebeletše bidio ka Seromani, yeo e rego Ke ka Baka la Eng o Swanetše go Ithuta Beibele?, ke ge a kgotsa gantši a re: “Se ke se ga gešo!”

Hlatse yeo e bitšwago Matthias yeo le yona e bego e bolela ditaba tše dibotse kua Hamburg e re: “Sehlopha seo nna le mosadi wa ka re bego re le go sona re be re le ba seswai. Moo re bego re le gona go dula Basinti le Baromani ba e ka bago ba 400. Batho ka moka bao re boletšego le bona ba be ba re kgopela dikgatišo.” Bettina yo le yena a bego a le Hamburg o oketša ka gore: “Batho ba bangwe ba be ba lla ge ba bona gore Dihlatse tša Jehofa di dirile dikgatišo ka Seromani.” Ka ntle le go senya nako ba bantši ba ile ba thoma go balela dikgatišo tšeo godimo gomme ba bangwe ba kgopela tše dingwe gore ba yo nea bagwera ba bona.

Basinti le Baromani ba bantši ba ile ba amogela taletšo ya go ya dibokeng tša Dihlatse. Go bile le batho ba 94 dibokeng tšeo, gomme bontši bja bona e be e le la mathomo ba e ya Holong ya Mmušo. Kua Reilingen, kgauswi le toropo ya Heidelberg batho ba 123 ba bile gona dibokeng. Ka morago ga diboka batho ba bahlano ba go bolela Seromani ba ile ba kgopela go rutwa Beibele.

Dihlatse tša Jehofa di neile batho dipampišana le diporoutšha tše e ka bago tše 3 000 ge di be di etetše mafelong ao. Di ile tša kgona le go boledišana le Basinti le Baromani bao ba fetago 360 gomme tša thoma go ithuta Beibele le ba 19. Ba mmalwa ba batho bao, ba itše: “Go thabiša kudu go bona gore Modimo o na le taba le rena.”