Go šišinywa gore lefaseng ka moka go na le batho ba milione o tee le seripa bao ba šomago dikepeng. Ka ge batho bao ba šomago dikepeng ba sa dule felo gotee, Dihlatse tša Jehofa di ka kgona bjang go ba ruta Beibele? Ge sekepe se fihla boemakepeng, Dihlatse tšeo di tlwaeditšwego di tsena ka sekepeng seo gomme tša ruta basesiši le batho bao ba šomago ka sekepeng Beibele le go ba nea mahala dikgatišo tšeo di theilwego Beibeleng ka maleme a gabo bona.

Batho ba ile ba arabela bjang? Stefano, e lego Hlatse yeo e ithaopetšego go ruta batho bao ba šomago dikepeng boemakepeng bja Vancouver kua Canada o re: “Batho ba bangwe ba bona eka batho bao ba šomago dikepeng ga se ba loka e bile ba na le dipelo tše thata. Ga se ba bantši bao ba lego ka tsela yeo. Ba bantši bao re bego re boledišana le bona ba be ba ikokobeditše e bile ba tloga ba nyaka go ithuta.” Stefano o okeditše ka gore: “Bontši bja bona ba dumela gore Modimo o gona e bile ba nyaka gore a ba šegofatše, ke ka baka leo gantši ba re theetšago.” Dihlatse tša Jehofa di ile tša laletšwa go tsena dikepeng tšeo di lego boemakepeng bja Vancouver ka makga a fetago a 1 600 magareng ga kgwedi ya September 2015 le ya August 2016! Batho bao ba šomago dikepeng ba ile ba newa dikgatišo tše dintši ka maleme a go fapafapana gomme bao ba fetago 1 100 ba ile ba thoma go ithuta Beibele.

Ka ge Dihlatse tša Jehofa di hwetšagala boemakepeng bjo bongwe le bjo bongwe lefaseng ka moka, batho bao ba nyakago go tšwela pele ba ithuta Beibele le Dihlatse, ba ka kgopela gore di ba etele boemakepeng bjo ba yago go bjona. Ka mohlala, ka May 2016, Dihlatse tša Jehofa kua Vancouver di ile tša kopana le Warlito yo e lego moapei yo mogolo wa ka sekepeng sa go rwala diphahlo. Di ile tša mmontšha bidio yeo e rego, Ke ka Baka la Eng o Swanetše go Ithuta Beibele? gomme tša thoma go mo swarela thuto ya Beibele di diriša poroutšha ya Ditaba tše Dibotse tše di Tšwago go Modimo! Warlito o ile a rata seo a bego a se kwa gomme a nyaka go tšwela pele a ithuta Beibele, eupša sekepe seo a bego a šoma go sona se be se tlo ema boemakepeng bja kgole bja Paranaguá kua Brazil.

Ka morago ga kgwedi, ge sekepe seo Warlito a bego a šoma go sona se fihla boemakepeng bja Paranaguá, o ile a makala kudu ge a bona Dihlatse tše pedi di tsena ka sekepeng seo gomme di botšiša gore Warlito o kae! Dihlatse tšeo di ile tša mmotša gore Bakristegotee le tšona ba Vancouver, ba di boditše gore o nyaka go ithuta Beibele. Warlito o ile a thaba kudu go bona Dihlatse tšeo tša Brazil gomme a di botša kamoo a lebogago ka gona gore go dirilwe tokišetšo ya gore a tšwele pele ka go ithuta Beibele. Ka lethabo, o ile a dumela go tšwela pele a ithuta Beibele le Dihlatse boemakepeng bjo bo latelago.