Kua Queens, New York, Dihlatse tša Jehofa tše 23 di sa tšwa go tsena diklase tša go ithuta go bolela le go bala Sebengali, e lego leleme leo le bolelwago kua Bangladesh le dikarolong tša India. Di ile tša tsenela klase ya go ithuta leleme ka pela yeo e bego e rutwa ke Dihlatsegotee le tšona.

Klase ya go ithutela Sebengali ke e nngwe ya diklase tše mmalwa tšeo di swerego kua United States le dinageng tše dingwe. Morero wa go tsena diklase tše ke go ithuta go abelana molaetša wa Beibele le batho bao ba bolelago maleme a mangwe.

Magaly, e lego morutwana wa klase ya Sebengali o hlalositše ka gore: “Palo ya batho bao ba bolelago Sebengali lefelong la gabo rena e gola ka go akgofa. Batho ba tsomana le dikarabo tša dipotšišo tše bohlokwa tše bjalo ka gore: ‘Ke ka baka la’ng go na le tlaišego e ntši gakaaka?’ Batho ba nyaka go tseba ka mo go oketšegilego ge ke ba botša ka dikholofetšo tša Modimo tše di kgahlišago tša nakong e tlago. Eupša ka mehla polelo e ba lepheko.”

E le gore ba thuše barutwana go ithuta ka pela ka mo go kgonegago, bahlahli ba ile ba diriša mekgwa ya go ruta e kgahlišago. Mokgwa o mongwe o be o akaretša go ithuta ka go diriša boitšhišinyo bja mmele e le gore monagano o thušwe go gopola ka nako e telele.

Ka morago ga klase e nngwe le e nngwe, barutwana ba be ba diriša seo ba ithutilego sona ka go etela batho bao ba bolelago Sebengali tikologong ya gabo bona gomme ba kgopela batho gore ba boledišane le bona ka Beibele. Magaly o itše: “Batho ba thabile e bile ba ipotšiša lebaka leo ke ithutago leleme la bona. Taba ya gore ke be ke fetša nako ke ithuta segagabo bona e ba thušitše go bona bohlokwa bja molaetša wa rena.”

Dihlatse tša Jehofa ga di fo ithuta leleme le šele feela eupša di hwetša le tlhahlo ya go ba bahlahli ba diklase tša maleme. Magareng ga January 2006 le January 2012, diklase tše 38 tša go ithutela maleme di rutile bahlahli ba 2 244 tikologong ya lekala la United States feela. Go thoma ka September 1, 2012, Dihlatse tša Jehofa tikologong ya lekala la United States di swere diklase tša ka godimo ga tše 1 500, go rutwa maleme a 37.