Lefaseng ka moka, batho ba tlwaetše go bona diteroli tša Dihlatse tša Jehofa tšeo di nago le dikgatišo tše di theilwego Beibeleng ditoropong tše dikgolo. Ka mohlala, kua Jeremane Dihlatse tša Jehofa di ile tša bea diteroli tša tšona tša dikgatišo toropong ya Berlin, ya Cologne, ya Hamburg, ya Munich le ditoropong tše dingwe tše dikgolo.

Na mokgwa wo wa go bea diteroli o tla atlega ditoropong tše dinyenyane tšeo badudi ba Jeremane ba yago maikhutšong go tšona? Batho ditoropong tša ka leboa le tša kgauswi le lewatle gotee le dihlakahlakeng tša lewatle la Baltic le la ka Leboa ba tla re’ng ge ba bona diteroli tše? Ngwageng wa 2016, ofisi ya lekala ya Dihlatse tša Jehofa yeo e lego Bogareng bja Yuropa e ile ya rulaganya gore go be le lesolo le le kgethegilego la go araba dipotšišo tše. Go tloga ka May go fihla ka October, Dihlatse tša Jehofa tše e ka bago tše 800 tšeo di tlwaetšego go diriša diteroli ditoropong tše dikgolo, go akaretša le tšeo di tšwago Vienna kua Austria, di ile tša ithaopela go yo nea batho dikgatišo di diriša diteroli mafelong a e ka bago a 60 ka leboa la Jeremane.

Dihlatse di ile tša amogelwa gabotse. Mosadi yo mongwe yo a bego a šoma moo diteroling o itše: “Batho ba be ba thabela dikgatišo tša rena. Ba be ba re dumediša, ba nyaka go tseba gore re dira eng e bile ba re botšiša dipotšišo tše dingwe.” Mosadi yo a bitšwago Heidi yoo a ilego a ithaopela go yo bea teroli toropong ya Plön o itše: “Ka morago ga matšatši a sego kae, batho ba be ba re tšea re le karolo ya toropo yeo. Ba bangwe bao ba bego ba šetše ba re tlwaetše ba be ba re emišetša matsogo ge ba re bona.” Monna wa sefoa yoo a dirišago polelo ya diatla o itše: “Le hwetšagala gohle!” Monna yoo le bagwera ba gagwe ba be ba etšwa sebokeng sa difoa seo se bego se swaretšwe ka borwabohlabela bja Jeremane, moo le gona a bego a bone Dihlatse tša Jehofa.

Batho ba bangwe bao ba dulago moo ba ile ba ithaopela go thuša Dihlatse tša Jehofa. Lephodisa le lengwe le ile la botša Dihlatse gore di ka dira’ng gore di kgone go bolela le batho ba bantši Sehlakahlakeng sa Wangerooge. Toropong ya Waren an der Müritz, molaodi wa sekepe sa go bontšha baeng naga o be a bontšha banamedi a mangwe a mafelo a kgahlišago. O ile a ba bontšha teroli ya dikgatišo yeo e bego e le kgauswi le moo dikepe di emago ke moka a re: “Kua le tla ithuta se sengwe ka Modimo.” Batho ba bantši bao ba bego ba tlile maikhutšong ba ile ba tla diteroling tšeo gomme ba ipha nako ya go bala di-poster tšeo di bego di le moo.

Batho bao ba bego ba etetše ditoropo tšeo le bao ba dulago moo ba ile ba kgahlwa ke diporoutšha tše tše tharo:

• Na Modimo o na le Taba le Rena? Mosadi yo a bego a etile o itše: “Ke kgale ke ipotšiša potšišo ye. Gona bjale ka ge ke le maikhutšong, ke tla hwetša nako ya go bala poroutšha ye gore ke hwetše karabo.”

• Ditaba tše Dibotse tše di Tšwago go Modimo! Mokgalabje yo mongwe o ile a botša Dihlatse tša Jehofa gore o be a sa kgahlwe ke dilo tšeo di diregago dikerekeng. Dihlatse tšeo di ile tša mo thuša go kwešiša gore ga go na motho le o tee yo a ka kgonago go rarolla mathata a batho, ke Modimo feela yo a ka kgonago go a rarolla. Monna yoo o ile a amogela poroutšha yeo ya Ditaba tše Dibotse gomme a tshepiša gore o tla e bala.

• Seo ke Ithutago Sona ka Beibeleng. Monna yo mongwe o ile a dumelela morwedi wa gagwe yo monyenyane gore a tšee poroutšha ye yeo e diretšwego bana. Go oketša moo, o ile a tšea Puku ya ka ya Ditaba tša Beibele gomme a re: “Ye yona e tla thuša lapa la ka.”

Batho bao ba bego ba feta ka tsela ba ile ba tšea dikgatišo tšeo di fetago tše 3 600. Ba bangwe ba ile ba kgopela Dihlatse tša Jehofa gore di ba etele ka malapeng a bona gore di tle di boledišane le bona ka Beibele.

Dihlatse tšeo di ilego tša tšea karolo modirong wo wa go nea batho dikgatišo di diriša diteroli di ile tša ipshina. Jörg le mosadi wa gagwe e lego Marina ba ile ba ya ba šomela tikologong ya kgauswi le Lewatle la Baltic. Ba re: “E be e le mpho e kgethegilego. Re ile ra thabela go bona tlholo ya Modimo le go botša batho ba bangwe ka yena.” Lukas yo a nago le mengwaga e 17 o re: “Ke ipshinne kudu! Ga se ka no ipshina, eupša ke ile ka kgona le go boledišana le ba bangwe ka dilo tša bohlokwa kudu.”