Go tloga ka di-22 go fihla ka di-28 tša August 2016, Dihlatse tša Jehofa kua Botswana, moo go nago le mmaene o mogologolo wa taamane lefaseng, di ile tša bontšha batho matlotlo a sa tlwaelegago moletlong wo o bitšwago Botswana Consumer Fair. Tafola ya tšona e be e na le dikgatišo tše di theilwego Beibeleng, e bile di bontšha batho wepesaete ya jw.org le dibidio tšeo di thušago malapa go tia.

Batswadi le bana bao ba ilego ba ya tafoleng yeo ba ile ba kgahlwa ke dibidio tša dipopaye tša Eba Mogwera wa Jehofa, tšeo di rutago tsela e botse ya go diriša melao ya Beibele. Batho ba bantši ba ile ba botšiša gore ba ka hwetša bjang dibidio tšeo ka ge go na le dibidio tše sego kae feela tša dipopaye ka Setswana, e lego leleme leo le bolelwago ke batho ba bantši nageng ye ya Botswana.

Baeng bao ba tlilego ba etšwa nageng ka moka, ba ile ba tšea dikgatišo tše e ka bago tše 10 000 gomme batho ba 120 ba kgopela go swarelwa thuto ya mahala ya Beibele. Batho ba bantši ba ile ba kgahlwa ke gore Dihlatse tša Jehofa tšeo di tšwago diphuthegong tša Seisemane le tša Setswana di be di šoma gotee tiragalong ye.

Ge balaodi ba tiragalo ye ba be ba ahlola ditafola tšeo di bego di beilwe tiragalong ye, ba ile ba re Dihlatse tša Jehofa di tšwile maemong a pele.