Ka 1987, Lyman Swingle, setho sa Sehlopha se Bušago sa Dihlatse tša Jehofa, o boletše le batho ba 63 580 bao ba bego ba bokane lefelong la Plaza Monumental bullring Valencia, Venezuela. Ba bantši ba be ba tšere maeto bošego ka moka ka pese go tla go mo theetša. Ngwanabo rena Swingle ge a bolela le lešaba le o itše: “Ga le sa le sehlophana feela sa batho. Ga bjale le sehlopha seo se bonagalago. Go ya ka ponagalo ya dilo, letšatši le lengwe le tla ba sehlopha sa bagoeledi ba 100 000!”

Ka 1987, Venezuela e be e na le bagoeledi ba fetago 38 000—e lego Dihlatse tša Jehofa tšeo di bego di bolela ka ditaba tše di botse tša Mmušo ka mafolofolo. Ka nako yeo, e be e le feela dinaga tše seswai tšeo di bego di na le bagoeledi ba fetago 100 000.

Go oketšega ga Dihlatse lefaseng ka moka e bile selo se kgahlišago kudu. Ka morago ga Ntwa ya Pele ya Lefase, go be go na le Dihlatse tše dikete tše mmalwa feela tšeo di bego di tsebatša Mmušo wa Jehofa. Seo se ile sa fetoga. Puku ya Ngwaga ya Dihlatse tša Jehofa ya 1943 e boletše gore: “Pego yeo e bego e kopantšwe ya 1942, le ge e be e sa felelela ka baka la go hloka boitsebišo bjo bongwe, e bile pego e šegofaditšwego . . . , ka ge e bontšha gore lefaseng ka moka go na le Dihlatse tšeo di bolelago ka Mmušo tše 106 000.” Go sa šetšwe tlhakahlakano yeo e bakilwego ke Ntwa ya Bobedi ya Lefase, ba bantši ba ile ba amogela molaetša wa Beibele gabotse. Ka 1950, United States feela e ile ya ba le Dihlatse tše fetago 100 000 tšeo di bego di bolela ka Mmušo.

Naga yeo e ilego ya latela United States ka go fihlelela palo ya Dihlatse tše 100 000 tšeo di bolelago ka Mmušo e bile Nigeria ka 1974.

Ngwageng o latetšego, palo ya Dihlatse tšeo di bolelago ka Mmušo Brazil le Jeremane e ile ya feta 100 000. Koketšego ye e bilego gona dikontinenteng tše tše nne e bile bohlatse bjo bo kgahlišago bja gore molaetša wa Beibele o amogetšwe lefaseng ka moka.

Lefaseng ka moka, palo ya bao ba amogelago ditaba tše dibotse e sa dutše e oketšega. Se se dumelelana le seo Beibele e se boletšego e sa le pele gore: “Yo monyenyane e tla ba ba sekete (1 000) gomme mmotlana a ba setšhaba se matla. Nna Jehofa, ke tla akgofiša se ka nako ya gona.”—Jesaya 60:22.

Go ya ka pego ya ngwaga wa tirelo wa 2014, go na le dinaga tše 24 tšeo e nngwe le e nngwe ya tšona e nago le Dihlatse tšeo di bolelago ka Mmušo tše fetago 100 000. Dinaga tše di akaretša Venezuela, yeo e fihleletšego palo ye ka 2007. Lefaseng ka moka, go na le diphuthego tše 115 416 tša Dihlatse tša Jehofa le Dihlatse tšeo di bolelago ka Mmušo tše 8 201 545.