Nywaga e Masomešupa ya Sekolo sa Gilead
Ka February 1, 1943, klase ya mathomo ya sekolo se se kgethegilego e ile ya thoma kua New York leboa. Sekolo seo, ka ge bjale se tsebja e le Sekolo sa Beibele sa Watchtower sa Gilead, se ile sa nea banna le basadi ba fetago 8 000 go tšwa dikarolong ka moka tša lefase tlwaetšo e kgethegilego.
Ka godimo: Bogorogelong bja Sekolo sa Gilead, South Lansing, New York. Ka tlase: Mohlahli wa Gilead o bolela le ditho tša klase ya-bo 31, sefaleng sa dipapadi
Jonathan, yo a sa tšwago go aloga klaseng ya Gilead, o re: “Seo re ithutilego sona go tšwa Lentšung la Modimo, se tla re thuša gore re atlege tšhemong le ge e le efe goba setšo.” Mosadi wa gagwe, e lego Marnie, o oketša ka gore: “Go feta le ge e le neng peleng, ke rata go thuša batho go bona gore ga go tsela e kaone ya bophelo go phala yeo Mmopi wa rena a re reretšego yona. Ke kgodišegile gore go thuša batho ba bangwe go tseba Jehofa go tla kaonefatša maphelo a bona.”
Sekolo sa Gilead se nea thuto ya dikgwedi tše hlano mahala. Thuto ya sona e lebiša šedi Beibeleng le bohlokwa bja go dira mošomo wa boebangedi. Morero wa thuto ye ke go thuša dialoga gore di matlafatše le go kgothatša bahlanka ba Modimo le go thuša bohle gore ba hlagolele dika tša moya tšeo di nyakegago gore ba kgone go lebeletšana le ditlhohlo ka katlego. Nakong ya sekolo seo, barutwana ba fetša nako ka klaseng ba ahlaahla melao ya motheo ya Mangwalo yeo e ba thušago gore ba matlafatše tswalano ya bona le Modimo wa bona Jehofa.
Ka godimo: Ka 1958, ge Albert Schroeder a be a ruta barutwana ba Gilead a diriša mohlala wa taberenakele. Ka tlase: Ka 1968, ge Ulysses Glass a be a hlahla klase ya bo-46 ya Gilead
Banyalani bao ba yago Gilead ke badiredi ba nako e tletšego feela. Ge ba aloga, ba ka boela dikabelong tša bona goba ba abelwa gore ba hlankele nageng e nngwe. Ba bangwe ba abelwa go šoma go e nngwe ya diofisi tša makala tše fetago 90 tša Dihlatse tša Jehofa. Ba bantši ba abelwa go hlankela mafelong ao a nago le batho ba bantši gore ba tšwetše pele modiro wa boboledi.
Mathomong Sekolo sa Gilead se be se le Kingdom Farm, kua South Lansing, New York. Ka 1961, se ile sa hudušetšwa ntlongkgolo ya lefase ka bophara ya Dihlatse tša Jehofa kua Brooklyn, New York. Go tloga ka 1988 go fihla ka 1995, sekolo se se be se swarelwa Watchtower Farms, kua Wallkill, New York. Ke moka, ka 1995 sekolo se se ile sa hudušetšwa moo ga bjale se lego gona, e lego Lefelong la tša Thuto la Watchtower, kua Patterson, New York. Ka March 2013, klase ya bo-134 ya sekolo e ile ya aloga.
Ka godimo: Ka 2003 ge barutwana ba klase ya bo-116 ba le ka phapošing ya go rutela. Ka tlase: Ka 2011 ge barutwana ba be ba ithuta bokgobapukung bja Gilead
Ka nywaga e 70 dialoga tša Sekolo sa Beibele sa Watchtower sa Gilead di ile tša bea mohlala o mobotse wa go nea bohlatse ka Jehofa ka potego.
You May Also Like
DITIRAGALO TŠE DI KGETHEGILEGO
Go Aloga ga Klase ya bo-136 ya Sekolo sa Beibele sa Watchtower sa Gilead
Bahlahli le diboledi tše dingwe ba ile ba kgothatša barutwana go hlagolela boemo bja monagano bjo bo bego bo le go Jesu. Bao ba bego ba le gona ba ile ba thabela dipoledišano le ditiragatšo tša diphihlelo tša tirelo ya tšhemo.
DITIRAGALO TŠE DI KGETHEGILEGO
Go Aloga ga Klase ya bo-135 ya Sekolo sa Beibele sa Watchtower sa Gilead
Batho bao ba fetago ba 10 000 ba ipshinne ka tiragalo ye e kgahlišago ya moya ka September 14, 2013. Ipshine ka dintlhakgolo tša lenaneo.
DIKANEGELO TŠA DILO TŠE DI DIREGILEGO
Go Fihla Mafelelong a Lefase
Sekolo sa Beibele sa Watchtower sa Gilead se swaregile kudu ka modiro o bohlokwa wa boboledi. Ipshine ka diphihlelo go tšwa go bao ba tsenego sekolo se se se kgethegilego.