Dihlatse tša Jehofa di sa tšwa go swara dikopano tše di kgethegilego kua Brazil, Costa Rica, Hong Kong, Ireland, Isiraele, New Zealand le Sweden. Ya mathomo ya dikopano tše e be e swaretšwe kua Sweden ka July 2012 gomme tše tharo tša mafelelo di be di swaretšwe kua Costa Rica le New Zealand ka January 2013.

Go etša dikopano tše dingwe tša selete tša matšatši a mararo tšeo re di rulaganyago ngwaga le ngwaga, dikopanong tše tše di kgethegilego go be go na dipolelo tšeo di theilwego Beibeleng, dipontšho le diterama.

Go be go laleditšwe batho bao ba tšwago dinageng tše dingwe gore ba tle ba be gona dikopanong tše tše di kgethegilego. Ba kgonne go bona naga yeo ba e etetšego pele le ka morago ga dikopano.

Yo mongwe wa bao ba bego ba tlile kopanong yeo e bego e swaretšwe kua Brazil o itše: “Ke kgahlišitšwe kudu ke go bona lerato le legolo la bana babo rena le tsela yeo ba ilego ba re amogela ka yona. E be eka ke sa tšwa go hwetša ditho tše difsa tša lapa.”

Yo mongwe wa baeng yoo a bego a le kopanong e kgethegilego ya kua Hong Kong, o itše: “Ke kgomilwe kudu ke go bona batho ba myemyela e bile ba bangwe ba lla ge baeng bao ba bolelago Semandarin ba gokaretše dikgatišo tše difsa tše di theilwego Beibeleng tšeo di sa tšwago go lokollwa.”

Ngwaga o mongwe le o mongwe, Dihlatse tša Jehofa di swara dikopano tša selete lefaseng ka bophara. Batho ba dimilione ba ba gona dikopanong tše.

Bao ba tlago dikopanong tše ba ba le dibaka tše dintši tša go bona lerato, lethabo le khutšo ya borwarre bja bana babo rena. Se se bonagala kudu dikopanong tše di kgethegilego goba tša ditšhabatšhaba. Ka nako ya go khutša, bao ba tlilego kopanong ba bolela le ba bangwe le go ja gotee le bona, ba fana dimpho le go fana tsebišo yeo ba ka ikgokaganyago ka yona, ba tšea dinepe le go gokarelana.

Go swana le dikopanong tše dingwe tša rena, bao e sego Dihlatse tša Jehofa ba dumeletšwe go ba gona.