Sehlogo sa kuranteng ya Frankfurter Rundschau se be se re: “O be o ka Nagana Gore ke Moletlo wa Lapa”. Bao ba bego ba tlile kopanong le bona ba dumelelana le sehlogo se.

Karla, yo a tšwago Puerto Rico o re: “Ba ntirile gore ke ikwe ke le gae ga mahlaku!”

Sara, yo a tšwago Australia o re: “Ke be ke ikwa e ka ke etetše lapa la gešo, leo le lego karolong e nngwe ya lefase.”

Ke eng se se dirilego gore batho ba ba bolele mantšu a a borutho? Ke kopano ya Ditšhabatšhaba ya Dihlatse tša Jehofa. E be e le Commerzbank-Arena toropong ya Frankfurt am Main, nageng ya Jeremane, go tloga ka July 18 go ya go 20, 2014. Batho ba ka bago 37 000 ba be ba tlile kopanong ye.

Batho ka moka bao ba bego ba le gona ba be ba tletše go ithuta Beibele. Lenaneo le la thuto ya Beibele le be le akaretša mmalo wa Beibele, dikopelo, dithapelo, diterama tše pedi le dipolelo tše maatla tšeo di theilwego Beibeleng.

Batho bao ba bego ba le kopanong ye ke Dihlatse tša Jehofa tša nageng ye gotee le baeng ba fetago 3 000 go tšwa Australia, Afrika Borwa, Brithania, Gerika, Lebanon, Serbia, le United States. Dihlatse tše ka bago 234 tšeo di hlankelago tirelong e kgethegilego ya nako e tletšego go tšwa dinageng tše 70 di be di tlile kopanong ye.

Dikarolo tše dingwe tša lenaneo di be di kgokagantšwe ka inthanete mafelong a mangwe a 19 a Jeremane, gotee le mafelong a mangwe nageng ya Austria le Switzerland. Palomoka ya batho bao ba bego ba le mafelong a ka moka e bile 204 046.

Toropong ya Frankfurt, lenaneo le be le swerwe ka Segerika, Seisemane le Sejeremane. Mafelong a mangwe dipolelo di be di fetolelwa sammaletee ka maleme a 17, go akaretša Searaba, se-China, Setamil, Seturkey le dipolelo tše pedi tša diatla.

Le ge e le gore Dihlatse di bolela maleme a fapanego le go tšwa dinageng le ditšong tše sa swanego, di be di sa arogana—di be di bokantšwe ke lerato. (Johane 13:34, 35) Di be di swarana le go ipona e le bana ba motho.

Tobias, wa Brithania o re: “Re tlogile re iponela ka mahlo kamoo borwarre bja rena bja lefase ka bophara bo fenyago mellwane ka gona.”

Davianna, yo a tšwago Puerto Rico o re: “Ke hlakane le Dihlatse tše tšwago dinageng tše fetago 20. Re kopantšwe ke gore ka moka ga rena re rata Modimo le go ratana seng sa rena.”

Malcom, wa Australia o re: “Ke bile Hlatse ya Jehofa nageng e nyenyane.” Ke ile ka bala ka borwarre bjo re nago le bjona bja lefase ka bophara le go bona dibidio tše kopana tša bjona. Bjale mo ke bo bona gabotsebotse. Go bona se go ntira gore ke kwešiše gabotse seo se bolelwago ke borwarre bja lefase ka bophara. Ruri go ba mo go matlafatša tumelo.”

Dihlatse go tšwa diphuthegong tše 58 toropong ya Frankfurt le ka ntle ga yona di be di lokišeditše dimpho le mananeo a go thabiša baeng.

Cynthia, wa United States o re: “Re tloga re amogetšwe ka diatla tše pedi.” Nka se tsoge ke lebetše lerato la bana bešo le tšwago pelong, botho bja bona le go nea ka diatla tše bulegilego.”

Simon, wa Jeremane o boletše gore: “O be o kgona go bona lerato le legolo, go segwa ka lethabo le maikwelo a borutho a bana ba motho. Re ka ithuta dilo tše dintši go rena ka moka.”

Amy, wa Australia o itše: “Lenaneong la thapama leo bana babo rena ba bego ba re thabiša ka lona le mpontšhitše gore rena Dihlatse tša Jehofa, ga re phele bophelo bja go nagana feela ka bodumedi bja rena. Re thabela boithabišo bjo bo sa solegego, e lego boithabišo bja kgonthe.”

Kopano ye ya Frankfurt ke e nngwe ya dikopano tša ditšhabatšhaba tšeo di ilego tša swarwa dinageng tše senyane go dikologa lefase.

Ge moeng yo mongwe yo a bego a tlile kopanong a botšišwa gore kopano ye e be e le bjang, o ile a araba ka gore: “Nagana o hweditše setho sa lapa leno sa kgauswi, e re ke re kgaetšedi’ ago ka mohlala, yo o bego o sa mo tsebe. Ge o se na go kopana le yena, o go amogela ka pelo ya gagwe ka moka le go go bulela legae la gagwe. Tsela yeo o tla thabago ka yona ga e hlalosege. Bjale atiša lethabo leo ga 37 000. Ye ke tsela yeo go bego go le ka yona kopanong ye.”