Mafelobekeng a October 5 le 6, 2013, batho ba 1 413 676 bao ba lego dinageng tše 31 ba be ba le gona sebokeng sa bo-129 sa Watch Tower Bible and Tract Society of Pennsylvania, ba bangwe ba le Holong ya Kopano ya Dihlatse tša Jehofa kua Jersey City, New Jersey, U.S.A., mola ba bangwe ba kgokagantšwe ka bidio.

Guy Pierce, yo e lego setho sa Sehlopha se Bušago sa Dihlatse tša Jehofa, e be e le modulasetulo wa seboka se. O ile a dira gore batheetši ba fagahlele seboka se ka go ba botša gore lenaneo le le tla araba dipotšišo tše bohlokwa tša Beibele, sa phadimiša le go feta seetša sa therešo le go nea ‘dijo tša moya ka nako e swanetšego.’—Mateo 24:45; Diema 4:18.

“Pontšho e Godišago Jehofa.”

Mark Sanderson, yo e lego setho sa Sehlopha se Bušago, o ile a bolela ka diswantšho tša pontšho e nago le sehlogo se se rego “Beibele le Leina la Modimo,” e lego ntlongkgolo ya Dihlatse kua Brooklyn, New York, U.S.A. Pontšho yeo e bontšha moo leina la Modimo le bego le le gona Mangwalong a Seheberu le Mangwalong a Bakriste a Segerika, e bile e na le Dibeibele tše dintši tša kgale, mengwalo ya bogologolo le matlakala a Beibele go tšwa Mengwageng ya Magareng.

Selo se sengwe seo se kgahlišago seo se lego gona pontšhong ye ke phetolelo ya Beibele ya lekgolong la bo-16 la ngwaga, yeo e fetoletšwego ke William Tyndale, yo e lego mofetoledi wa mathomo wa Beibele wa go ngwala leina la Modimo ka Seisemane, gotee le letlakala la go tšwa kgatišong ya bo-1602 ya phetolelo ya Sepanishi yeo e tsebjago e le Reina-Valera Bible, yeo ka mehla e bego e ngwala leina la Modimo e le “Iehova.” Le gona pontšhong yeo go na le Beibele ya Seisemane yeo e tsebjago e le Great Bible (yeo e gatišitšwego ka 1549), le kopi ya Beibele e fetoletšwego ke Elias Hutter ya maleme a 12 (Kgatišo ya 1599, yeo gape e tsebjago e le Nuremberg Polyglot) gotee le Geneva Bible (e gatišitšwego ka 1603), tšeo ka moka ga tšona di dirišago leina la Modimo.

Ngwanabo rena Sanderson o ile a laletša motho yo mongwe le yo mongwe gore a tle a bone pontšho ye ya Dibeibele gomme a re: “Re tloga re rapela gore . . . e thuše batho ba dipelo tše dibotse ba mengwaga ka moka, bao ba rutegilego le bao ba sa rutegago, gore ba rate dilo tše pedi tšeo ka moka ga rena re di ratago—Lentšu le le kgahlišago la Modimo, e lego Beibele, le leina la gagwe le le phagamego e lego Jehofa.”

Sehlogo sa Ngwaga sa 2014.

Ka morago ga gore Gerrit Lösch, yo e lego setho sa Sehlopha se Bušago, a nee kakaretšo ya beke yeo ya Morokami, Ngwanabo rena Pierce o ile a tsebiša sehlogo sa ngwaga sa 2014, seo se rego: “Mmušo wa gago a o tle.” (Mateo 6:10) Le ge se e tla dula e le sehlogo se se swanelago ngwaga o mongwe le o mongwe go Dihlatse tša Jehofa, se tloga e le se se swanelegago kudu ngwageng wo, ka ge 2014 e swaya go fela ga mengwaga e lekgolo ga e sa le Mmušo wa Modimo o hlongwa legodimong.

“Mpho e Bohlokwa go tšwa go Modimo.”

Ke moka batheetši ba ile ba ipshina ka bidio e bolelago ka histori ya Phetolelo ya Lefase le Lefsa, e lego Beibele e gatišitšwego ke Dihlatse tša Jehofa yeo le batho ba bangwe ba bonego e le phetolelo e kaonekaone yeo e kilego ya tšweletšwa. Ge Nathan Knorr a be a lokolla bolumo ya mathomo ya phetolelo ye ka 1950 Kopanong ya Ditšhabatšhaba ya Koketšego ya Pušo ya Modimo, o ile a nea batheetši keletšo yeo e sa lego bohlokwa le lehono, a re: Balang phetolelo ye ka moka. Ithuteng yona. Thušang ba bangwe go ithuta yona, ka ge se se tla ba thuša gore ba bitše leina la Jehofa.

“Go Ikgopotša tša Bogologolo.”

Samuel Herd, yo e lego setho sa Sehlopha se Bušago, o ile a nea polelo ye, yeo e bego e akaretša poledišano yeo e gatišitšwego ya metsotso e mene yeo go yona go bego go boledišanwa le ditho tše nne tša lapa la Bethele la U.S. tšeo di bego di le gona ge Phetolelo ya Lefase le Lefsa e be e lokollwa la mathomo ka dibolumo tše tshelelago tšeo di ikemetšego magareng ga 1950 le 1960.

Eunice Timm o gopola ge a be a diriša Phetolelo ya Lefase le Lefsa dibokeng tša Bokriste. O thabela dikarolo tša nyakišišo, tše bjalo ka ditšhupetšo. O itše ka ge go be go tla ba thata go rwala dibolumo tše ka moka ge a eya dibokeng, o be a sepela le bolumo yeo a bego a tla e diriša gotee le Beibele e nyenyane ya King James Version gore a bale mangwalo ge go be go ka balwa ao a bego a sa nagane gore a tla balwa.

Beibele yeo e mpsha e ile ya kgoma dikarolo tše dingwe tša borapedi bja rena. Ka mohlala, Fred Rusk o ile a anega gore pele ga 1950, bao ba bego ba rapelela lapa la Bethele ba be ba diriša mantšu a lego ka go King James Version, a bjalo ka “thy kingdom come.” Gateetee ka morago ga gore Phetolelo ya Lefase le Lefsa e lokollwe, ba ile ba tlogela mantšu ao a sa kwagalego gomme ba rapela ba diriša mantšu ao batho ba tlwaelanego le ona.

John Wischuk o be a se a thabišwa feela ke go kwagala ga yona eupša a thabišitšwe le ke boikokobetšo bja Komiti ya Phetolelo ya Beibele ya Lefase le Lefsa. O itše: “Ga se ya nyaka go tsebja ge e be e sa phela goba le e hlokofetše, ka ge e be e nyaka gore letago ka moka le išwe go Jehofa Modimo.” Charles Molohan o ile a bolela tsela yeo sehlopha ka moka se bego se ikwa ka yona ge a be a re: “Phetolelo ya Lefase le Lefsa e re thušitše go kgonthišetša therešo ka dipelong tša rena gomme ya thuša go matlafatša tumelo ya rena, e le gore re ka kgona go yo thuša ba bangwe gore le bona ba be le tumelo.”

“Re ba kwa ba Bolela ka Maleme a Gabo Rena Mabapi le Matete a Modimo.”

(Ditiro 2:11) Geoffrey Jackson, yoo le yena e lego setho sa Sehlopha se Bušago, o neile polelo yeo go yona go lokolotšwego Phetolelo ya Lefase le Lefsa e kaonefaditšwego ya 2013. Mafelelong a polelo ya gagwe, bao ba bego ba le gona, go akaretša le bao ba bego ba kgokagantšwe ka bidio, ba ile ba hwetša kopi ya Beibele ye.

Ngwanabo rena Jackson o boletše gore go fetile mengwaga e 60 ga e sa le go lokollwa bolumo ya mathomo ya Phetolelo ya Lefase le Lefsa. Ga e sa le go tloga ka nako yeo, leleme la Seisemane le fetogile, eupša morero wa phetolelo ya rena ya Beibele wona ga se wa fetoga. Re nyaka gore Lentšu la Modimo le be ka tsela e kwagalago gabotse ntle le gore le fetoše seo le se bolelago.

Ka 2005, Sehlopha se Bušago se ile sa lemoga gore go tloga go nyakega gore Beibele e fetolelwe ka maleme a mantši. Ga e sa le go tloga ka nako yeo, palo ya maleme ao a gatišitšego Phetolelo ya Lefase le Lefsa e oketšegile go tloga go 52 go ya go 121, mola ga bjale go na le maleme a 45 ao a sa swaregilego ka yona. Ge bafetoledi ba dutše ba fetolela Phetolelo ya Lefase le Lefsa ka maleme a gabo bona, ba ile ba kgopela go hlalosetšwa mantšu a mangwe goba dipolelwana tše itšego. Go ba go fihla ga bjale, go ile gwa botšišwa le go arabja dipotšišo tše di fetago tše 52 000 gomme tše dingwe tša dipotšišo tšeo di ile tša dira gore go lemogwe gore mongwalo wa Seisemane o swanetše go fetošwa gore o swane le wa sebjalebjale.

Ka mohlala, Ngwanabo rena Jackson o ile a hlalosa gore go 1 Samuele 14:11, Phetolelo ya Lefase le Lefsa ya Seisemane ya nakong e fetilego e be e re Jonathane le bahlabani ba gagwe “ba ile ba dira gore ba bonagale go madira a Bafilisita.” E le go phema gore se se se balege gabedi, phetolelo e kaonefaditšwego e re “ba ile ba itšweletša.” Ka mo go swanago, nakong e fetilego Mika 2:6 e be e re: “Lena batho le se ka la ntšha mantšu melomong ya lena. Ba ntšha mantšu melomong ya bona.” Temana ye ga bjale e balega ka gore: “‘Le se ke la porofeta.’ Ba a porofeta.”

Mengwaga e mehlano e fetilego, Sehlopha se Bušago se ile sa kgetha komiti ya go kaonefatša Phetolelo ya Lefase le Lefsa gomme ga bjale modiro woo o feditšwe. Beibele ye e kaonefaditšwego ke e botse, e balega gabonolo e bile e ka se senyege ka pela le ge e ka dirišwa nako e telele. Ngwanabo rena Jackson o tsebišitše gore Beibele ya Seisemane ya mongwalo o mogolo le e nyenyane di tla tšweletšwa e se kgale.

‘Go Swara Lentšu la Therešo ka Tshwanelo.’

Stephen Lett, yoo le yena e lego setho sa Sehlopha se Bušago, o ile a ahlaahla dikarolo tša motheo tša Beibele ye e mpsha e kaonefaditšwego, a theile sehlogo sa gagwe go 2 Timotheo 2:15. Polelwana e fetoletšwego e le ‘go swara ka tshwanelo’ ge e le gabotse e bolela “go sega ka nepo.” Re nyaka go diriša “tšhoša ya moya” ka nepo, ka go nepagala ka mo go feletšego. (Baefeso 6:17) Ke moka Ngwanabo rena Lett o ile a bontšha kamoo dikarolo tša motheo tša Beibele ye di ka re thušago ka gona go dira seo.

1. Karolo ya ka mathomong e nago le sehlogo se se rego: “Matseno a Lentšu la Modimo,” e na le ditemana tša Beibele tšeo di arabago dipotšišo tše 20 tša dithuto ša motheo tša Beibele.

2. Lemetletšo A le hlalosa dikarolo tša phetolelo ye e kaonefaditšwego, tše bjalo ka diphetogo tša sebopego le tlotlontšu ya yona gotee le go diriša ga yona leina la Modimo.

3. Lemetletšo B, leo le nago le dikarolo tše 15 tša mebalabala, le na le mebapa le diswantšho tšeo di tlago go go thuša thutong ya motho ka noši le ge o ruta ba bangwe.

4. Mathomong a puku e nngwe le e nngwe ya Beibele, “Kakaretšo ya Dikagare” e akaretša puku ka moka, seo sa thuša mmadi gore kapejana a kgone go hwetša karolo yeo a ka ratago go e bala. Karolo ye e tšea legato la ditšhupetšo tšeo di bego di tšwelela kua godimo ga letlakala le lengwe le le lengwe Beibeleng ya kgale.

5. “Pukuntšu ya Beibele” e hlalosa mantšu a makgolo ao a dirišwago ka Beibeleng ye.

6. “Tlhatlamano ya Mantšu a Beibele” e fokoditšwe kudu. Ga bjale e na le mantšu le ditemana tšeo di šomago kudu bodireding le ge go rutwa.

7. Ditšhupetšo tšeo di bego di tšwelela gare ga letlakala le lengwe le le lengwe le tšona di fokoditšwe. Eupša ga bjale go na le feela tšeo di holago bodireding.

8. Mengwalo ya tlase e na le tsela e nngwe ya go fetolela mantšu, lentšu ka lentšu le taba e dikologilego.

JW Library.

John Ekrann, e lego setho sa Komiti ya Lekala la United States, o ile a bontšha kamoo sedirišwa se sefsa sa JW Library se šomago ka gona go didirišwa tša elektroniki, tše bjalo ka difouno le dithapolete. Ge motho a na le JW Library a ka kgona go ba le Phetolelo ya Lefase le Lefsa e kaonefaditšwego gotee le diphetolelo tše dingwe tše hlano tša Beibele. Sedirišwa se se ile sa lokollwa mahala mabenkeleng a magolo ao a rekišago didirišwa ka October 7, 2013.

“Go Fetolela Lentšu la Modimo Gore le Fetiše Molaetša o Nepagetšego.”

Anthony Morris, yo e lego setho sa Sehlopha se Bušago, o ile a hlalosa melao ya motheo yeo e dirišitšwego ke Komiti ya Phetolelo ya Beibele ya Lefase le Lefsa ge e be e lokišeletša go kaonefatša Beibele ye. Ge e be e diriša 1 Bakorinthe 14:8, 9 mošomong wa yona, komiti ye e ile ya nyaka go kgonthišetša gore Beibele ye e kaonefaditšwego e kwešišega gabonolo. Ge e ba mokgwa wa go fetolela lentšu ka lentšu o be o tla fapoša molaetša wa Beibele, e be e phema go o diriša.

Ka mohlala, ge Genesi 31:20 e be e ka fetolelwa lentšu ka lentšu, e be e tla balega ka gore: “Jakobo a utswa pelo ya Labane.” Lega go le bjalo, seka sa Seheberu seo se dirišitšwego mo se fapana le tsela yeo seka sa Seisemane se bego se kwešišwa ka yona, ka gona ga bjale Phetolelo ya Lefase le Lefsa e balega ka gore: “Jakobo a radia Labane.” Ka mo go swanago, phetolelo ya lentšu ka lentšu ya 1 Bakorinthe 7:39 e be e bolela gore mosadi o be a swanetše go nyalwa ke monna yo mongwe ge e ba monna wa gagwe “a be a ka robala.” Ka ge ka dinako tše dingwe Mangwalo a diriša lentšu “robala” e le go emela lehu, Phetolelo ya Lefase le Lefsa e thuša mmadi gore a se gakanege ka go diriša mantšu a rego “a ka robala lehung.”

Ngwanabo rena Morris o itše: “Beibele e ngwadilwe go dirišwa mantšu ao motho yo mongwe le yo mongwe a bego a a diriša—e ka ba balemi, badiši goba barei ba dihlapi. Phetolelo e botse ya Beibele e dira gore molaetša wa yona o kwešišwe ke batho ba dipelo tše dibotse, go sa šetšwe gore ba tšwa kae.”

“Go Diriša ‘Mantšu a Thabišago’ le ‘Mantšu a Nepagetšego a Therešo.’”

David Splane, yoo le yena e lego setho sa Sehlopha se Bušago, o ile a nea polelo e theilwego mantšung a lego go Mmoledi 12:10. Bangwadi ba Beibele ba be ba le šedi ge ba be ba ngwala dikgopolo tša Modimo gomme sehlopha sa mathomo sa Komiti ya Phetolelo ya Beibele ya Lefase le Lefsa le sona se ile sa ba šedi modirong wa sona. Phetolelo ya Lefase le Lefsa e kaonefaditšwego e sa dutše e latela molao wa motheo o rego: “Ngwala mantšu a nepagetšego a therešo” gomme o dire gore molaetša wa Modimo o kwagale gabotse.

Ngwanabo rena Splane o itše: “Mantšu a mantši a Seisemane a na le ditlhaloso tše dintši. Ka mohlala, Phetolelo ya Lefase le Lefsa ya kgale e be e diriša mantšu a bjalo ka “mohlala wa mantšu a phedišago” go 2 Timotheo 1:13. Lentšu “mohlala” le na le ditlhaloso tše mmalwa, e nngwe ya tšona ke “sebopego.” Go ya ka tlhaloso ye, ba bangwe ba boletše gore polelwana ye e šupa go sebopego se se kgahlišago goba mohlala, woo motho a ka o hwetšago dithutong tša Beibele. Lega go le bjalo, tlhaloso yeo e swanelago leleme la mathomo ke “mohlala . . . wo o swanetšego go ekišwa.” Ka baka leo, phetolelo e kaonefaditšwego e diriša polelwana e rego “mokgwa wa mantšu a kgahlišago.”

Ngwanabo rena Splane gape o ile a bolela ka diphetogo tšeo di bakilwego ke go fetoga ga leleme la Seisemane. Ka mohlala, lentšu la Seisemane la “kokotelwa,” leo le bego le dirišitšwe Beibeleng ya kgale ya Phetolelo ya Lefase le Lefsa la go hlalosa tsela yeo Jesu a bolailwego ka yona, gantši le be le šupa go kota e nago le ntlha yeo motho a bego a hlabja ka yona gomme a šale a lekeletše go yona. Ka ge ye e be e se tsela yeo Jesu a bolailwego ka yona ge a le koteng ya tlhokofatšo, phetolelo e kaonefaditšwego e dirišitše lentšu le lengwe bakeng sa “kokotela koteng” go hlalosa tsela yeo Jesu a bolailwego ka yona.—Mateo 27:22, 23, 31.

Ngwanabo rena Splane o ile a phetha ka gore: “Re rapela gore ge o bala le go ithuta Phetolelo ya Lefase le Lefsa e kaonefaditšwego o batamele—o be o batamelane kudu le Jehofa. Eka ka mehla a ka dula a le Tate wa gago, Modimo wa gago le Mogwera wa gago.”

Phetho.

Ngwanabo rena Pierce o ile a bapetša Beibele ye e mpsha le dijo tše dibose ‘monyanyeng wa Jehofa wa dijo tša makhura.’ (Jesaya 25:6) Ke moka o ile a ruma lenaneo le ka tsela e swanelago ka go laletša batheetši go opela Kopelo No. 114 go tšwa pukung ya Opelela Jehofa, e nago le sehlogo se se rego: “Puku ya Modimo ke Lehumo.”