Ka September 13, 2014, klase ya bo-137 ya Sekolo sa Beibele sa Watchtower sa Gilead e ile ya aloga lefelong la tša thuto la Dihlatse tša Jehofa kua Patterson, New York. Sekolo se se tlwaetša bahlankedi ba Dihlatse tša Jehofa bao ba nago le phihlelo e kgolo go tšwela pele ba kaonefatša bokgoni bja bona bja go aga diphuthego le diofisi tša makala ao ba abetšwego go ona. Batho ba 12 333 ba ile ba bogela lenaneo ba le Patterson goba ba kgokagantšwe ka bidio ba le Canada, Jamaica, Puerto Rico, le United States.

Samuel Herd e lego setho sa Sehlopha se Bušago sa Dihlatse tša Jehofa e be e le modula setulo wa lenaneo le. Mantšung a gagwe a go bula, o ile a bolela kudu kamoo menagano ya Jehofa e phagametšego ya rena ka gona. (Jesaya 55:8, 9) O boletše gore le ka morago ga go fetša dikgwedi tše hlano tšeo barutwana ba bilego le tšona tša go tlatša menagano ya bona ka menagano ya Modimo, ge e le gabotse ga se ba hlwa ba dira selo, go sa na le mo gontši moo ba swanetšego go ithuta gona gore ba tsebe “karolwana ya mediro gagwe [Modimo].” (Jobo 26:14) Ngwanabo rena Herd o ile a bolela gape gore ka mehla ge re kopana go boledišana ka menagano ya Modimo re a holega, ka gona lenaneo le le lona le tla re hola.

“Dika Tšeo di Enywago ke Moya ke ... go se Fele Pelo.” (Bagalatia 5:22) John Larson yo e lego setho sa Komiti ya Lekala la United States, o ile a gatelela ditsela tše pedi tšeo re ka bontšhago go se fele pelo, e lego seka seo se enywago ke moya o mokgethwa wa Modimo. Sa pele, re swanetše go se felele Jehofa pelo ge a dutše a re tlwaetša le go re thuša gore re tie tumelong. (1 Petro 5:10) Aborahama o re beetše mohlala o mobotse wa go se felele Jehofa pelo ge a be a mo tlwaetša gomme mafelelong a phethagatša kholofetšo ya Gagwe go yena.—Baheberu 6:15.

Sa bobedi, ga se ra swanela go iphelela pelo. Ka morago ga go hwetša tlwaetšo ya Gilead, barutwana ba ka letela go bona dipoelo tša kapejana. Ge e ba dilo di sa sepele gabotse gateetee ka morago ga go fihla dikabelong tša bona, ba ka ipotšiša gore, ‘Bothata bja ka ke eng?’ A ba kgothatša go tšwa phihlelong ya gagwe, ngwanabo rena Larson o ile a ba kgonthišetša gore ba ka kgona go lebeletšana le mathata ka go se iphelele pelo le go dula ba le mafolofolo ge Modimo a sa dutše a ba tlwaetša.—Baheberu 6:11, 12.

“Anke Dipelo tša Lena di Ikokobetše le go Phela ka mo go sa Felego!” Anthony Morris wa Sehlopha se Bušago o ile a thea sehlogo sa gagwe go Psalme 22:26, yeo karolo ya yona ya mafelelo e fetoletšwego lentšu ka lentšu ka gore “anke dipelo tša lena di phele ka mo go sa felego.” Go hwetša tšhegofatšo ye, re swanetše go ikokobetša. Ngwanabo rena Morris o ile a gatelela gore re swanetše go ikokobetša gore re dirišwe ke Jehofa. Ka moka ga rena, gaešita le bao e bilego Bakriste ka mengwaga e mentši re ka lahlegelwa ke pono ya kamoo go lego bohlokwa go ekiša Jesu Kriste.—2 Petro 1:9.

Mangwalo a na le mehlala ya bao ba ilego ba bontšha boikokobetšo le bao ba sa kago ba bo bontšha. Heroda Agaripa ka boikgogomošo o ile a amogela go tumišwa ke batho bao ba bego ba mo nea letago leo le bego le swanetše Modimo feela, ka baka le morongwa wa Modimo o ile a mo otla ka legadima gomme “a jewa ke diboko.” (Ditiro 12:21-23) Go fapana le se, Petro ka morago ga go kgalemelwa ke Jesu ka baka la go nagana “dikgopolo tša batho, e sego tša Modimo,” ga se a ka a ngala goba go befelwa. (Mateo 16:21-23) O ile a amogela tayo gomme a ba mohlala wa boikokobetšo.—1 Petro 5:5.

Ka ge Barutwana ba bangwe ba tla hwetša dikabelo tša go hlankela legaeng la Bethele go a mangwe a makala a Dihlatse tša Jehofa, Ngwanabo rena Morris o ile a ba eletša ka gore ntle le boikokobetšo ba ka se thabele dikabelo tša bona. Lega go le bjalo, ga go bonolo gore motho a bone gore ga a na boikokobetšo. Go gatelela ntlha ye, ngwanabo rena o ile a bolela gore mengwaga e mentši e fetilego ge mogolo a be a newa tayo ka ge a be a hloka boikokobetšo, o ile a ngwalela ofising ya lekala a re: “Ga gona motho yo a ikokobeditšego go swana le nna.” Ngwanabo rena Morris o ile a kgothaletša barutwana go efoga mokgwa wo. Ba tla dula ba ikokobeditše ge eba ba sa bone bolaodi bja bona e le bjo bo phagamego, go e na le moo ba tla lemoga gore bolaodi bja kgonthe ke bja Jehofa Modimo le Jesu Kriste.

“Ga a ‘Nee Moya ka go Lekanyetša.’” (Johane 3:34) Michael Burnett yo e lego mohlahli wa sekolo sa Gilead o ile a gopotša barutwana gore moya o mokgethwa o tla ba thuša go lebeletšana le mathata goba dipelaelo tšeo ba tlago go lebeletšana le tšona dikabelong tša bona. Moya wa Modimo o ile wa thuša Betsalele go lebeletšana le ditlhohlo tša kabelo ya gagwe ya go aga taberenakele. (Ekisodo 35:30-35) Moya wa Modimo ga se wa matlafatša feela bokgoni bja Betsalele bja tlhago bja go ba setsebi sa mošomo wa diatla eupša o ile wa mo thuša le go ruta ba bangwe. Moya o mokgethwa o ka dira se se swanago le go dialoga tše tša Gilead, kudukudu ge e ba di latela mokgwa wa go ruta go tšwa Mangwalong, woo ba ithutilego wona klaseng.

Mehleng ya Betsalele, basadi ba Baisiraele ba be ba raloka karolo ya bohlokwa nakong ya go aga taberenakele. (Ekisodo 35:25, 26) Ka mo go swanago dikgaetšedi tšeo di bego di le klaseng ye di ipontšhitše e le ‘basadi bao ba nago le dipelo tše bohlale’ ge ba dutše ba thekga banna ba bona. Ngwanabo rena Burnett o ile a phetha ka go eletša barutwana gore: “lekanyetšang bokgoni bja lena bja tlhago ka boikokobetšo le moya o kwago. Ge e ba le dira bjalo gona Jehofa o tla le fa moya o mokgethwa ka boati.”

“Na o tla Bina le Nna?” Mark Noumair e lego mothuši wa Komiti ya go Ruta, o ile a thea sehlogo sa gagwe a diriša mohlala wa Kgoši Dafida nakong ya ge areka ya kgwerano e tlišwa Jerusalema. (2 Samuele 6:12-14) Dafida o ile a bina ka lethabo le “makgoba a basadi a bahlanka ba yona” ge Areka e be e tlišwa. (2 Samuele 6:20-22) Makgoba a a basadi a ka se tsoge a lebetše letšatši leo Kgoši Dafida a binnego le wona ka lona. Ngwanabo rena Noumair o ile a kgothatša barutwana go ‘bina le makgoba a basadi.’ O ile a ba botšiša gore: “Na o tla tsebega ka go thuša bao ba nago le maikarabelo a manyenyane goba bao ba se nago wona? . . . Na o tla tšeela batho ba bangwe godimo ka baka la dika tša bona tša moya?”

Barutwana ba tla ekiša Jehofa ge e ba ba tšwela pele ba bontšha botho ka mokgwa wo. (Psalme 113:6, 7) Le ge batho bao ba phelago le bona ba ka palelwa ke go bontšha boikokobetšo ga se ba swanela go dumelela mafokodi a bjalo go ba nyamiša. Ngwanabo rena Noumair o okeditše ka gore: “Itebelele o se wa bohlokwa. Swara dinku tša Jehofa ka tsela yeo a di swarago ka yona.”

“Go Nea Bohlatse ka Nako le ge e le Efe.” William Samuelson yoo a okamelago Lefapha la Dikolo tša Pušo ya Modimo, o ile a bolela ka moapostola Paulo e le yoo a bego a diriša sebaka se sengwe le se sengwe go bolela ditaba tše dibotse. (Ditiro 17:17) Ngwanabo rena Samuelson o ile a dira gore barutwana ba diragatše diphihlelo tšeo ba di thabetšego tirelong ya tšhemo ge ba be ba le Gilead. Ka mohlala, banyalani ba bangwe ba ile ba gahlana le motho yo a rekiša lebenkeleng. Ba ile ba ema go fihlela ge morekiši a fetša go thuša bareki ke moka ba mmontšha bidio ya Ke ka Baka la Eng o Swanetše go Ithuta Beibele? Ba ile ba mmontšha gape le kamoo a ka yago Wepesaeteng ya jw.org, moo a ka hwetšago ditaba ka leleme la gabo la Selaotia.

“Dulang Tirelong ya Mmušo.” William Nonkes, yo a šomago Lefapheng la Tirelo kua lekaleng la United States, o ile a boledišana le barutwana ba dialoga ba bane. Ka ge ba ile ba bontšha moya wo o begilwego go Jesaya 6:8 ka go ba tirelong ya Mmušo, sekolo se se tlo ba tlwaetša ka mo go oketšegilego. Kgaetšedi Snolia Maseko o hlalositše gore Gilead e mmontšhitše moo a swanetšego go kaonefatša gona, kudukudu tabeng ya go diriša nako ka bohlale ka morago ga go fetša letšatši tirelong. O itše: “Tlwaetšo ya sekolo se e mpontšhitše gore nka kgona go dira mo gontši go feta ka mokgwa wo ke naganago ka gona.” Ngwanabo rena Dennis Nielsen o ithutile kamoo Tsefanya 3:17 e ka mo thušago go lebeletšana le go nyama bodireding. Ngwanabo rena o boletše gore: “Ge ke le bodireding gomme batho ba sa arabele gabotse, ke swanetše go tseba gore Jehofa o thabile kudu, ka gona le nna ke swanetše go thaba.”

“Šetšang ka Kelohloko Dinonyana tša Legodimo.” (Mateo 6:26) Stephen Lett wa Sehlopha se Bušago o neile polelo ya thwadi lenaneong le. Sehlogo se se be se theilwe thutong ya Jesu ya gore re swanetše go “šetša,” goba go lebeledišiša ka kelohloko, dinonyana, Ngwanabo rena Lett o boletše dithuto tše mmalwa tšeo re ka ithutago tšona dinonyaneng.—Jobo 12:7

Ka mohlala ka ge Jehofa a fepa dinonyana, le rena o tla re fepa. Re ditho tša “ntlo ya Modimo,” ka gona o re kgonthišetša gore o tla ‘babalela bao e lego ba gagwe.’ (1 Timotheo 3:15; 5:8) Ke therešo gore re swanetše go bapala karolo ya rena. Go swana le ge dinonyana di eya go sela dijo tšeo Modimo a di neago tšona, re swanetše go ‘tšwela pele re tsoma Mmušo pele’ go hwetša ditšhegofatšo tša gagwe.—Mateo 6:33

Ngwanabo rena Lett o bontšhitše gape gore dinonyana tše dintši di a goeletša ge di lemoga kotsi. Ka mo go swanago, le rena re lemoša ba bangwe ge go hlokagala, ka mohlala ge ngwanabo rena a “gata kgato e fošagetšego pele a lemoga.” (Bagalatia 6:1) Ka modiro wa rena wa boboledi, re lemoša batho ka “letšatši la Jehofa” leo le batamelago ka lebelo. (Tsefanya 1:14) Mohlaleng o mongwe Ngwanabo rena Lett o ile a hlalosa gore dinonyana tšeo di hudugago lefelong le lengwe go ya go le lengwe di fofa ka godimo ga dithaba tše ditelele, re kgona go lebeletšana le ditlhohlo tše swanago tše dikgolo ka thušo ya Jehofa.—Mateo 17:20

Phetho. Barutwana ba ile ba newa di-diploma tša bona, ke moka ka morago sealoga se sengwe se ile sa bala lengwalo la tebogo leo le tšwago klaseng ye. Mantšung a gagwe a go phetha Ngwanabo rena Herd o ile a swantšha go tšwela pele o tsenya dikgopolo tša Jehofa dipelong tša rena le modiro wa go kokotela seporo. Go nyakega gore sepikiri se kokotelwe ka makga a mmalwa gore se tsenelele. Ka mo go swanago, dialoga tše di swanetše go tšwela pele di nagana ka dilo tšeo di ithutilego tšona mo Gilead. Ke moka Ngwanabo rena Herd o ile a oketša ka gore: “Tšeang nako le di kokotela dipelong tša lena, latelang menagano ya Modimo gomme le tla ba tšhegofatšo.”