Karolo yeo go tsenwago ka yona ya moago o mofsa wa diofisi e lokišeletšwa go tsenywa paving le go bjala matšoba. Tsejana ya ka thoko ya bao ba sepelago ka maoto e na le mokgwa wa go e ruthetša e le gore marega batho ba se ke ba thelela. Moagong wo go na le Ofisi ya go hlokomela mediro ya Bethele, Ofisi ya Komiti ya Lekala le Lefapha la Tirelo.

Yo mongwe wa bao ba šomago Lefapheng la go lokiša ka gare o diriša motšhene wa go lokiša fase pele go tsenywa lebato. Motšhene wo o na le selo sa go goga moya seo se dirago gore ka gare ga moago go se be le lerole le lentši.

Lefelo leo le lokišitšwego la go amogela baeng le batho ba ka godimo ga ba 200 bao ba dulago Moagong wa Bodulo wa E. Ge go be go kaonefatšwa moago wo go ile gwa tsenywa mafasetere ao a sa tsenyego phefo le alamo e mpsha ya ge go na le mollo.

Motho yo a šomago ka dithapo o tsenya dithapo tša didirišwa tšeo di tlo dirišwago Lefelong le lefsa la go tlwaetša bao ba šomago ka dilo tša sethekeniki. Morero wa lefelo le ke go tlwaetša bašomi mešomo e bjalo ka go tsenya diphaephe le dipompi, go lokiša dilo tša mohlagase le go šoma ka tsela e šireletšegilego.

Motho yo a šomago ka mohlagase o tsenya mabone a go seketša mohlagase lefelong le lefsa leo le tlago go dirišwa ke Lefapha la go Nea Tlwaetšo ya Sethekeniki.

Mošomi o lebelela dikgoba tše di lego magareng ga diphaephe tše dinyenyane tša mohlagase. Lefelo le le ile la mpshafatšwa e le gore mafapha a ofisi ya komiti ya lekala ao a bego a šomela Brooklyn a kgone go hudugela moo.

Motho yo a šomago go tsenya diphaephe le dipompi o tsenya diphaephe tša go sepediša meetse a go fiša.

Batho bao ba šomago Lefapheng la go Lokiša Moago ka ntle ba nametše motšhene wo o ba thušago go fihla godimo gore ba thibe mašobana a mafasetere. Moagong wo o nnoši, go na le mafasetere a 298 ao a thušago go seketša mohlagase selemo le marega.

Batho bao ba nago le bokgoni bja go šoma ka maswika ba diriša maswika a leboto leo le bego le le moo go tloga ka bo-1970, go aga lefsa leboto leo le lego bogareng bja lefelo la go phaka dikoloi. Lefelo leo la go phaka dikoloi le magareng ga Meago ya Diofisi 1 le Moago wa Bodulo E.

Motho yo a šomago ka drywall (leboto leo le sa dirwago ka ditena) o gohla leboto leo gore le tlo pentiwa. Moagong wo woo o mpshafaditšwego, go na le lefapha la Accounting, la Dikhomphutha le la ba go Reka.

Motho yo a šomago ka mohlagase o goga thapo yeo e thibelago moago gore o se bethwe ke magadima gomme o e iša ka godimo ga moago woo. Ka ge thapo yeo e le yona e tla bethwago ke legadima, e dira gore matla a legadima a bethe mmung gomme seo sa šireletša moago woo gore o se senyege.

Ge go be go katološwa meago ya Wallkill, bana babo rena ba ile ba diriša šedi e kgolo gore ba se senye mehlare le matšoba ao a bego a le moo, go akaretša le mehlare e mentši yeo o e bonago seswantšhong se. Lefelo la go bolokela meetse leo o le bonago ka go le letshadi, leo le kgonago go swara dilithara tše e ka bago tše 150 000 tša meetse, le thuša kudu gore go hwetšwe meetse ao a dirišwago go tima mollo. Le gona meetse ao a dirišwa diphaepheng tšeo di kgonago go tima mollo ka botšona meagong ya Wallkill.

Motho yo a šomago ka mapolanka o tsenya a mangwe a mapolanka ao a betlilwego gabotse a e ka bago a 1 800 karolong ya ka morago ya moago woo lapa la Bethele le swarelago diboka go wona. Mapolanka a ao a sa lekanego, a thuša gore ge motho a bolela go se be le medumo yeo e mo šalago morago.

Yo ke Ngwanabo rena Charles Reed. O hlanketše Bethele go tloga ka 1958. Ngwanabo rena Reed, o ile a thuša go hlama le go tsenya dilo tšeo di bego di dirišwa metšheneng ya go phrintha nakong ya ge Bethele ya Brooklyn e be e sa tšweletša dikgatišo bakeng sa United States le dinaga tše dingwe tše dintši. Nakong ya ge go be go katološwa meago ya Wallkill, Ngwanabo rena Reed o be a šoma le bao ba hlahlobago gore dilo ka moka di dirilwe ka tsela ya maleba.

Bašomi ba fološa ditulo tša lefelo leo lapa la Bethele le swarelago diboka go lona. Go ka dula batho ba 812 lefelong leo.

Go mphsafatšwa ga lefelo go be go akaretša go tsenya disekirini le siling ya go lekelela yeo e kgonago go swara modumo.

Le ke lefelo leo baoki ba šomelago go lona lefelong leo le mpshafaditšwego. E le gore balwetši ba hlokomelwe gabotse, diphasetši di ile tša katološwa gomme dintlwana tša bona le tšona tša godišwa.

Seswantšho sa meago ya Wallkill, yeo go yona go dulago ditho tša lapa la Bethele tše e ka bago tše 2 000. Modiro o mogolo wa go katološa, wo o akaretšago disekwere mithara tša ka godimo ga tše 102 000 tša meago e mefsa goba yeo e mpshafaditšwego, o fedile ka di-30 tša November 2015.