Jesu o boletše gore ditaba tše dibotse tša Mmušo di be di tla bolelwa go batho bohle lefaseng ka bophara. (Mateo 24:14) Ga e sa le go tloga ka 1909, Dihlatse tša Jehofa di be di fetolela dipuku tšeo di theilwego Beibeleng ka Sepanishi, e le gore di thuše batho lefaseng ka bophara go kwa molaetša wa Mmušo ka leleme la bona. Ga bjale Sepanishi ke leleme la bobedi leo le bolelwago ke batho ba bantši lefaseng ka bophara, gomme se latela se-China, le gona lefaseng ka bophara batho ba e ka bago seripa sa bilione ba bolela Sepanishi.

William, yo e lego setho sa sehlopha sa bofetoledi sa Sepanishi o re: “Sepanishi ke leleme la ditšhabatšhaba gomme se bolelwa dinageng tše mmalwa tšeo di nago le ditlogo tše di fapafapanego. Pakane ya rena ke go fetolela ka tsela yeo e kgomago dipelo tša babadi bao ba tšwago ditlogong tše di sa swanego le maemong a sa swanego a thuto le bophelo.” Ditho tša sehlopha seo di tšwa Argentina, Colombia, El Salvador, Guatemala, Mexico, Puerto Rico, United States, Uruguay, Venezuela go akaretša le Sepania, gomme se se thuša bafetoledi ba gore ba kgone go tšweletša bofetoledi bjoo bo kwešišwago ke babadi ba ditlogo tše di fapafapanego.

Ka mengwaga e mentši, Dihlatse tša Jehofa di be di dutše di fetolela leleme le kua United States, di thušwa ke bafetoledi ba Dihlatse ba kua Argentina, Mexico le Sepania. Lega go le bjalo, ka 1993 sehlopha se sa bofetoledi se ile sa hudugela Puerto Rico ke moka se se dirile gore bafetoledi ba tlišwe lefelong letee gore ba šome gotee.

Ka March 2012, go ile gwa fihlelelwa phetho ya go huduša Lefapha la Bofetoledi la Sepanishi, ga bjale se hudušeditšwe ofising ya lekala ya Dihlatse tša Jehofa ya Sepania. Edward o gopola gore: “Ga se ra huduša batho, dilo tša rena gotee le dithoto feela eupša re ile ra ba ra tšea le sedirišwa sa rena se bohlokwa e lego bokgobapuku bja lefapha la bofetoledi.” Bokgobapuku bjo bo na le dipuku le dipukwana tša go dira nyakišišo tše ka bago tše 2 500, go akaretša diphetolelo tše makgolokgolo tša Dibeibele tša Sepanishi.

Ka May 29, 2013, ditho tša Lefapha la Bofetoledi la Sepanishi di ile tša gorogela legaeng la tšona le lefsa gomme tša amogelwa ka borutho ke lapa la Bethele la Sepania. Bafetoledi, bokgobapuku bja lefapha gotee le ditlabakelo di ile tša hudušwa gabotse go phatša Lewatleng la Atlantic, ka baka la modiro o thata woo o rulagantšwego gabotse, babadi ba Dihlatse ba Sepanishi ba ile ba hwetša dipuku le dipukwana tša bona bjalo ka mehleng. Edward o re: “Molaetša wa Mmušo ke wona wa bohlokwa,” e bile re nyaka gore babadi ba bantši ka mo go ka kgonegago ba Sepanishi ba di bale.”