Ngwaga o mongwe le o mongwe Dihlatse tša Jehofa di tšweletša dibidio tšeo di bogelwago dikopanong tša tšona tša selete. Bontši bja dibidio tšeo di dirwa ka Seisemane. Go tla bjang gore batho bao ba yago dikopanong tša selete tša maleme a mangwe ba kwešiše dibidio tšeo? Dibidio tšeo di fetolelwa le go rekhotiwa ka maleme a mangwe. Dibidio tšeo di kgoma bjang bao ba bago gona dikopanong tšeo tša selete?

Ekwa kamoo batho ba bangwe bao e sego Dihlatse tša Jehofa bao ba bilego gona dikopanong tša selete kua Mexico le Amerika Bogare ba ikwago ka gona:

• Monna yo mongwe yo a bilego gona kopanong ya selete ya Sepopoluca, kua Veracruz, Mexico o re: “Ge ke be ke bogetše dibidio tšeo, ke be ke sa no di kwešiša feela eupša ke be ke ikwa eka ke karolo ya tšona. Di nkgomile pelo.”

• Monna yo mongwe yo a bilego gona kopanong ya selete ya Senahuatl kua Nuevo León, Mexico o re: “Ge ke be ke bogetše dibidio tšeo, ke be ke ikwa okare ke gae ke bolela le mogwera wa ka yo mogolo. Dibidio tšeo di be di phala dimubi ka gore ke be ke kwešiša dilo ka moka.”

• Mosadi yo mongwe yo a bilego gona kopanong ya selete ya se-Chol kua Tabasco, Mexico o re: “Ge ke be ke bogetše dibidio tšeo ka leleme la gešo, ke be ke ikwa eka babapadi ba tšona ba be ba bolela le nna ka go lebanya.”

• Monna yo mongwe yo a bilego gona kopanong ya selete ya se-Cakchiquel kua Sololá, Guatemala o re: “Mokgatlo wo o tshwenyegile ka go thuša batho gore ba ithute ka Modimo ka maleme a gabo bona. Ga gona mokgatlo wo o swanago le wona.”

Go tla bjang gore Dihlatse tša Jehofa di tšweletše dibidio tša maemo a godimo, mola di sa hiri batho bao ba tlwaeditšwego go rekhotiša goba bao mantšu a bona a tlwaeditšwego go rekhota e bile di rekhotela mafelong a a lego kgole le ditoropo le ao a sa hlabologago?

Mengwageng e sa tšwago go feta, ofisi ya lekala ya Dihlatse tša Jehofa ya kua Amerika Bogare e ile ya rulaganya gore dibidio di fetolelwe ka Sepaniši le ka maleme a mangwe a 38 a moo. Baithaopi ba e ka bago ba 2 500 ba ile ba thuša mošomong woo. Dihlopha tša bafetoledi le bao ba šomago ka metšhene ya go rekhotiša ba be ba rekhotišetša ofising ya lekala, diofising tša bofetoledi goba mafelong a mangwe ba diriša ditudio tša motšwa-o-swere. Go ile gwa rekhothiwa mafelong a fetago a 20 kua Belize, Guatemala, Honduras, Mexico, le Panama.

E le gore go dirwe ditudio tša motšwa-o-swere, go be go nyakega gore batho bao ba di dirago ba šome ka thata le ka bokgwari. Go thibela mašata, ba ile ba diriša dilo tšeo di hwetšagalago mafelong ao, go akaretša mapai le materase.

Batho ba bantši bao ba bego ba etla go rekhota, ba be ba se na sa bona. Ka gona ba be ba dira sohle seo ba ka se kgonago gore ba fihle mafelong a go rekhota. Ba bangwe ba bona ba be ba tšea leeto la diiri tše 14 gore ba fihle moo. Boemong bjo bongwe, tate yo mongwe le morwa wa gagwe ba ile ba sepela diiri tše e ka bago tše seswai gore ba fihle lefelong la go rekhota.

Naomi o gotše ka gabo ba thuša go dira ditudio tša motšwa-o-swere. O re: “Re be re dula re fela pelo ya gore go rekhotiwa neng. Tate o be a šoma ka thata e le gore a rulaganye dilo tše di nyakegago. Mma o be a fela a apea dijo tša go lekana baithaopi ba 30.” Gona bjale Naomi ke moithaopi ofising ya bofetoledi ya Mexico. O re: “Ke thabela go fetša nako ya ka ke thuša batho gore ba kwe molaetša wa Beibele ka leleme la gabo bona. Mošomo wo o tloga o nkgotsofatša.”

Dihlatse tša Jehofa di ba le dikopano tša selete ngwaga le ngwaga lefaseng ka moka gomme batho ka moka ba laletšwa gore ba be gona. E le gore o tsebe ka dikopano tšeo, bona karolo ya DIKOPANO.