Kua Mexico le Bogareng bja Amerika, bafetoledi ba e ka bago ba 290 bao ba tšwago dinageng tše tshelela ba fetolela dipuku le dipukwana tšeo di theilwego Beibeleng ka maleme a fetago a 60. Ke ka baka la’ng ba itshwenya ka mokgwa wo? Ka baka la gore ge batho ba hwetša dipuku le dipukwana tšeo di theilwego Beibeleng ka maleme ao go lego bonolo go a kwešiša, gantši seo se ba kgoma dipelo.—1 Bakorinthe 14:9.

E le go kaonefatša bofetoledi, bafetoledi ba bangwe bao ba bego ba šoma ofising ya lekala ya Dihlatse tša Jehofa kua Mexico City ba ile ba išwa diofising tša bofetoledi mafelong ao maleme a bona a bolelwago gona. Seo se thušitše bjang? Bafetoledi ba ba gare ga batho bao ba bolelago maleme ao ba fetolelago dipuku le dipukwana go ona gomme se se dira gore go be bonolo go tšweletša dipuku le dipukwana tšeo di kwešišwago ke batho ba maleme ao.

Bafetoledi ba ikwa bjang ka phetogo ye? Federico yo e lego mofetoledi wa Senahuatl o re: “Mengwaga ka moka e ka bago e lesome yeo ke e dutšego Mexico City, ke ile ka hwetša lapa le tee feela leo le bolelago leleme la ka. Eupša ga bjale ditoropong tšeo di lego kgauswi le ofisi ya bofetoledi, mo e nyakilego go ba batho ka moka ba bolela leleme la ka.”

Karin, yo a fetolelago Sejeremane sa ka Leboa (Low German) kua ofising ya bofetoledi nageng ya Mexico toropong ya Chihuahua o re: “Go ba gare ga Mamenno go nthušitše gore ke tlwaelane le polelo yeo ba e dirišago letšatši le letšatši. Re dula le go šoma toropong e nyenyane gomme ge ke hlola ka lefasetere ke kgona go bona batho bao ba tlago go holwa ke modiro wa rena wa bofetoledi wo re o dirago mo.”

Neyfi, yo ga bjale a dulago ofising ya bofetoledi ya Mérida kua Mexico o re: “Ge re be re ruta batho Beibele ka Semaya, re ile ra thoma go lemoga mantšu ao batho bao ba bolelago leleme le ba sa a kwešišego gabonolo. Ka gona modirong wa rena wa bofetoledi re ile ra thoma go diriša mantšu ao batho ba ba tlwaelanego le wona.”

Batho bao ba hwetšago dipuku le dipukwana tšeo di fetoletšwego ba holega bjang? Tšea ka mohlala: Ka mengwaga e ka bago e 40, Elena yo a bolelago Setlapanec, o be a eya dibokeng tša Dihlatse tša Jehofa ka mehla. Ka ge diboka tše di be di swarwa ka Sepanishi, o be a sa kwešiše seo se bego se rutwa. O re: “Ke be ke tseba gore ke swanetše go ba gona dibokeng.” Eupša ka morago ga gore Elena a ithute Beibele a diriša diporoutšha tša Setlapanec, o ile a thoma go rata Modimo kudu go fihla bokgoleng bja gore a ineele go yena le go kolobetšwa ka 2013. Elena o re: “Ke leboga Jehofa ge a nthušitše go kwešiša Beibele.”