Ka October 7, 2013, Dihlatse tša Jehofa di ile tša lokolla lenaneo la khomphutha leo motho a ka kgonago go bala le go ithuta Beibele sedirišweng sa elektroniki leo le bitšwago JW Library. Lenaneo le leo le hwetšagalago mahala le na le diphetolelo tše tshela tša Dibeibele tša Seisemane go akaretša King James Version le Phetolelo ya Lefase le Lefsa ya Mangwalo a Makgethwa e kaonefaditšwego ya 2013. a

Batho ba dimilione ba ithekgile kudu ka di-smartphone, dithabolete goba didirišwa tše swanago le tšeo bakeng sa mošomo le go boledišana. Ka ge batho bao ba dirišago didirišwa tšeo ba šetše ba kgona go bala le go ithuta Beibele Wepesaeteng ya jw.org, ke ka baka la’ng JW Library e ile ya tšweletšwa?

Sa mathomo, ge motho a šetše a tsentšhitše lenaneo le didirišweng tša elektroniki ga go nyakege gore a tsene Inthaneteng, ka gona le ka dirišwa ntle le yona. Sa bobedi, le hlametšwe go thuša mmadi go lebelela mangwalo gabonolo le go ithuta Beibele ka mo go tseneletšego. Se se ka dirwa bjang?

Ge motho a thoma go bula JW Library, go tšwelela maina a dipuku tša Beibele. Ge motho a kgetha puku ya Beibele, go tšwelela lelokelelo la dikgaolo tšeo di lego pukung yeo. Se se dira gore go kgonege go hwetša temana e itšego goba mantšu a lego kgaolong yeo ka metsotswana. Lenaneo le le na le dibopego tše dingwe tše mmalwa tšeo di thušago motho go ithuta Beibele:

• Mengwalo ya tlase yeo e tšwelelago ditemaneng tšeo yeo e nago le tsebišo e oketšegilego

• Ditšhupetšeo tšeo di sepedišanago le ditemana tša Beibele

• Ge motho a nyaka lentšu goba polelwana, e ka mo iša moo e tšwelelago gona

• E na le dikagare tšeo di lego mathomong a puku e nngwe le e nngwe ya Beibele

• E na le tšhate yeo e bontšhago mongwadi yo mongwe le yo mongwe wa puku ya Beibele, lefelo le nako gaešita le lebaka leo e akareditšwego ka lona

• E na le karolo ya mebala ya go taga yeo e nago le mebapa, ditšhate, dinako le ditaekramo.

Go swana le dipuku le dipukwana ka moka tša Dihlatse tša Jehofa, JW Library le yona e hwetšagala mahala. Lenaneo le la go bala le go ithuta Beibele le thekgwa ka meneelo ya boithatelo e bile le šetše le taoneloutiwa ka makga a fetago a milione. (2 Bakorinthe 9:7) O re’ng o sa leke go šomiša lenaneo le gomme o holwe ke bokgobapuku bjo bja moswananoši bjoo o ka šikago ka bjona?