Ka January 2013, makasine wa Morokami o be o šetše o gatišitšwe ka Segreenland ka nywaga e 40. Segreenland ke leleme la ma-Inuit leo le bolelwago ke batho ba 57 000 feela.

Go na le Dihlatse tša Jehofa tše ka bago tše 150 kua Greenland, eupša Morokami wa Segreenland o balwa ke batho ba 2 300. Seo se ra gore bontši bja babadi ba makasine wa Morokami wo ka Segreenland o bitšwago Napasuliaq Alapernaarsuiffik, ga se Dihlatse.

Poledišanong yeo e tšweletšego thelebišeneng, molebeledi wa ofisi ya bofetoledi wa kua toropong ya Nuuk o itše: “Batho ba bantši ba Greenland ba rata Beibele kudu, ke ka baka leo ba balago kgatišo ya Napasuliaq Alapernaarsuiffik.”

Ge moswari wa lenaneo la thelebišene a botšiša yo mongwe wa bafetoledi ba leleme la setlogo la Greenland seo a se ratago makasineng woo, o itše: “Makasine woo o nthušitše kudu. Ka mohlala, makasine wo o mpontšhitše kamoo nka phelago gabotse. Ke be ke kgoga kudu, le ge ke be ke tseba gore go kotsi go dira seo. Eupša Beibele e re botša gore ge e ba re nyaka go phela gabotse, re swanetše go boloka mebele ya rena e hlwekile.”

Le gona kgašong yeo ya thelebišene go boletšwe gore modiro wa Dihlatse tša Jehofa o thomile kua Greenland magareng a bo-1950 gomme di be di dutše di gatiša dipuku le diporoutšha ka Segreenland. Bofetoleding bjoo bo dirwa ke baithaopi bao ba bolelago polelo ya Denmark le Greenland gomme pakane ya bona e be e dutše e le gore ka mehla phetolelo ya Segreenland e kwagale.

Hlatse e nngwe ya kgale yeo e tšwago Greenland e boletše gore: “Ka nywaga e 25 ke be ke nea bohlatse go batho ba Greenland e bile ke bone bohlokwa bja go ba le dikgatišo tša rena ka leleme la bona. Mafelong a mangwe a lego lekatana, ao a ka fihlelelwago feela ka seketswana dikgweding tše sego kae ka ngwaga, go na le batho bao ba ratago go bala dimakasine tša rena; ka ge re etela moo ka sewelo, re fela re ba romela mangwalo le dipuku tšeo di theilwego Beibeleng.”

Kgatišo e ithutwago le kgatišo ya batho bohle ya makasine wa Morokami wa Segreenland e thomile go ba gona go tloga ka January 2013. Le gona dikgatišo tše di ka balwa le go taoneloutwa go jw.org ka go kgotla konotswana e rego “Dikgatišo,” ke moka o kgethe leleme la Segreenland ke moka o kgotle “Nyaka.”