Go thoma ka January 2013, Phafoga! le kgatišo ya batho bohle ya Morokami di tla fokotšwa go tloga go matlakala a 32 go ya go a 16 tokollong e nngwe le e nngwe.

Ka ge dimakasine tše di ka se be le dihlogo tše dintši, dihlopha tša bafetoledi di tla kgona go di fetolela ka maleme a mantši. Ga bjale Phafoga! e fetolelwa ka maleme a 84 gomme Morokami ka a 195.

Kgatišo e ithutwago ya Morokami e tla tšwela pele e na le matlakala a 32.

Go fetoga ga dimakasine tša rena tšeo di gatišwago go tla kgoma Wepesaete ya rena ya www.pr418.com ka ditsela tše pedi.

1. Dihlogo tše dingwe tšeo di bego di tšwelela dimakasineng di tla tšwelela feela Wepesaeteng. Ka mohlala, dihlogo tša “Bakeng sa Bafsa,” “Seo ke Ithutago Sona ka Beibeleng” le pego ya go aloga ga sekolo sa Gilead yeo e bego e tšwelela kgatišong ya batho bohle ya Morokami le dihlogo tša “Bakeng sa go Boeletšwa ke Lapa” le “Bafsa ba a Botšiša” tšeo di bego di le go Phafoga! di tla tšwelela Inthaneteng feela.

2. Dihlogo tšeo di tšwelelago go Morokami le Phafoga! di tla tšwelela gape le ka mokgwa wa elektroniki. Ka mengwaga e mentši, di-PDF tša Morokami le Phafoga! di be di dutše di hwetšagala Wepesaeteng ya www.pr418.com. Ga bjale dimakasine tše di tla ba gona ka mokgwa wa HTML gore go be bonolo go di hwetša le go di bala ka khomphutha goba sedirišwa se sengwe sa elektroniki. Gape le tla kgona go bala dikgatišo tše dingwe tša rena tšeo di hwetšagalago Inthaneteng ka maleme a ka bago a 400.