Mafelo a go gatiša a Dihlatse tša Jehofa kua Mexico a hweditše sefoka sa Clean Enterprise ka nywaga e šupago ka go latelana.

Ka September 26, 2012, mmušo wa Mexico o ile wa nea Dihlatse tša Jehofa sefoka se se kgethegilego sa go leboga go “šoma ka thata [ga tšona] go hlokomela tikologo.”

Lenaneo la Clean Enterprise le thuša mekgatlo go hlabologa ka ditsela tše dintši tšeo di tlago go šireletša tikologo. Dihlatse tša Jehofa di tsenela lenaneo le ngwaga o mongwe le o mongwe, le ge di sa dire se gore di boelwe ke tšhelete. Mmoleledi wa meago ya go gatiša ya Mexico o re: “Gore re amogele sefoka sa Clean Enterprise, re swanetše go nea bohlatse bja gore meago ya rena le tsela yeo re šomago ka yona e dumelelana le melao ya tikologo ka mekgwa e šupago: moya, meetse, go lahlwa ga ditšhila, go lahla ditšhila tše kotsi ka tsela e šireletšegilego, tšhireletšego, go šomiša mohlagase le go tlwaetša bašomi go hlokomela tikologo. Ga go mokgatlo wo o gapeletšwago go ingwadiša lenaneong le. Re ingwadiša ka gobane re rata.”

Dihlatse tša Jehofa lefaseng ka bophara di leka ka gohle go phema go senya tikologo e kgahlišago ya lefase.