Dihlatse tša Jehofa tše senyane tša kua Australia di abetšwe disetifikeiti tša tebogo ka baka la go nea bafaladi bao ba golegilwego lefelong le lengwe la mafelo a magolo a go golega bafaladi kua Australia ditirelo tše kgahlišago. Dihlatse tšeo di amogetše difoka go tšwa lefelong la go golega bafaladi la Curtin Immigration Detention Centre kgauswi le Derby kua Bodikela bja Australia. a

Beke le beke, Dihlatse di etela bafaladi bao go kwa diphihlelo tša bona le go ba botša molaetša wa Beibele wa khomotšo le kholofelo. Christopher Riddoch e lego moemedi wa ditaba tša bodumedi le tša setšo lefelong leo o boletše gore: “Re bona ka mokgwa wo bafaladi ba kgomegago kudu ka gona gateetee ka morago ga go etelwa.” O boletše gore tsela yeo bafaladi ba ikwago ka yona e a kaonefala e bile ba thaba kudu ka morago ga go etelwa “ka ge ba tseba gore go na le batho bao ba kgomegilego kudu ka bona.”

Mna. Riddoch o boletše gape gore disetifikeiti tšeo di neilwego Dihlatse ke tsela ya go leboga maiteko ao di a dirago go “kaonefatša maphelo a bafaladi bao ba lego lefelong la bona.” O okeditše ka gore Dihlatse ke “tšhegofatšo malapeng a tšona, diphuthegong tša tšona le tumelong ya tšona.”