Dihlatse tša Jehofa di dumela gore merafo ka moka e a lekana mahlong a Modimo. (Ditiro 10:34, 35) Re leka go thuša batho go tumola lehloyo le le tsemilego medu dipelong tša bona re diriša thuto ya Beibele.

Go oketša moo, ga re thekge mokgatlo le ge e le ofe wo o tutuetšwago ke lehloyo la semorafo. Ka mohlala, mehleng ya Nazi, Dihlatse tša Jehofa tša Jeremane le tša mafelong a mangwe di ile tša gana go thekga lesolo la Hitler la lehloyo. Dihlatse tše dintši di ile tša bolawa ka baka la seo.

Ka mo go swanago, Dihlatse ga se tša ka tša kgothaletša ditho tša tšona go tsenya letsogo ge go be go fedišwa merafo e mengwe ka 1994 kua Rwanda. Ge e le gabotse, tše dingwe di ile tša bea maphelo a tšona kotsing goba tša bolawa ge di be di šireletša bao ba bego ba tsongwa le go bolawa.

Ka ge re nyaka go thuša batho ba merafo ka moka, re gatiša dikgatišo tše di theilwego Beibeleng le go di aba ka maleme a e ka bago a 600. Ka baka leo, diphuthegong tša rena re amogela batho ba ba “tšwago ditšhabeng tšohle, melokong yohle, merafong yohle le malemeng ohle.”—Kutollo 7:9.