Letšatši le lengwe le le lengwe bagolegwa bao ba lego dikgolegong tša U.S., ba ngwalela ofisi ya lekala ya Dihlatse tša Jehofa mangwalo, ba kgopela go rutwa Beibele.

Re arabela dikgopelo tšeo ka go rulaganya le badiredi bao ba tšwago diphuthegong tša kgauswi gore ba ithute Beibele le bao ba lego dikgolegong, dipetleleng tša mmušo, mafelong ao bafsa ba kopanago go ona le moo batho ba thušwago go tlogela diokobatši.

Dikgolegong tše dingwe, badiredi ba rena ba dula ba swara diboka tša phuthego. Ka mohlala, kgolegong e nngwe, batho ba 32 ba ile ba ba gona polelong ya phatlalatša yeo e ilego ya newa dikarolong tše pedi tša kgolego.

Go a kgahliša go bona kamoo dithulaganyo tše di thušitšego bagolegwa ba bangwe. Monna yoo a bego a golegilwe nageng ya Indiana, yo a ahloletšwego bophelo bja gagwe ka moka kgolegong ka baka la polao, o ile a dira diphetogo tše dikgolo semelong sa gagwe gomme o kolobeditšwe e le yo mongwe wa Dihlatse tša Jehofa.

Hlatse yeo e bego e ithuta Beibele le mogolegwa yo mongwe yo a bego a golegilwe teronkong e kgolo ya kua California, e itše: “Ke bone semelo sa gagwe le pele a ithuta Beibele gaešita le tšwelopele yeo a e dirilego. Diphetogo tšeo a di dirilego gore a swanelegele go kolobetšwa ke tše dikgolo kudu.”

Bagolegwa ba bantši ba ile ba amogela therešo ya Beibele gaešita le ge ba be ba tseba gore go dira seo go be go tla bea bophelo bja bona kotsing. Ka mohlala, ba bangwe ba bao ba ilego ba kgaotša go gwerana le sehlopha sa disenyi ba ile ba bewa seleng ba le noši goba ba išwa kgolegong e nngwe.

Bahlankedi ba kgolego ba kgahlišwa kudu ke ge ba bona Beibele e fetoša maphelo a bagolegwa. Ba bangwe ba ile ba nea Dihlatse disetifikeiti tša go leboga gomme mohlankedi yo mongwe o ile a ithaopela go nea Dihlatse sefoka ka baka la mošomo wa tšona o mobotse woo o dirwago dikgolegong.