Ka June 2013 dipula tšeo di sa tlwaelegago tša matlorotloro di bakile gore dinoka di tlale wa go falala kua Bogareng bja Yuropa. Kua Hungary, Noka ya Danube e be e tletše wa go falala go feta ka moo e kilego ya tlala ka gona historing ya yona.

Ka baka la tshenyo yeo e bakilwego ke mafula, lefapha la Hungarian Ministry of Human Resources leo le ikarabelago ka thušo ya setšhaba le ile la kgopela lekala la Hungary la Dihlatse tša Jehofa gore Dihlatse di thuše go thibela tshenyo yeo e bakwago ke mafula. Lekala le ile la arabela ka go kgopela diphuthego tšeo di lego kgaufsi le Noka ya Danube go tšea karolo modirong wa go thibela tshenyo ya mafula wo o bego o rulagantšwe ke bahlankedi ba mmušo ba tikologong yeo.

Diphuthego di ile tša thekga modiro wo ka tsela e makatšago. Matšatšing a latetšego, Dihlatse tše fetago tše 900 go tšwa diphuthegong tše 72 di ile tša tšea karolo modirong wa go thiba mariba a dinoka gore di se falale. Di ile tša kgopelwa go apara dipetšhe tšeo di nago le mantšu “Dihlatse tša Jehofa,” maina a tšona gaešita le maina a ditoropo tšeo di tšwago go tšona.

Toropong e nngwe, moemedi wa tikologong yeo wa mokgatlo wa Hungarian Red Cross o ile a romela molaetša wo phuthegong e nngwe: “Re a le leboga le go le hlompha ka ge re se ra tlwaela go bona moya wa botee le wa go ikemišetša go thuša—re sa lebale le maeto a matelele ao le a sepetšego go tla mo! Ga ke lewe ke dihlong go bolela ka mohlala wa lena o mobotse mo toropong ye.”

Modulasetulo wa mokgatlo wa tlhakodišo, yo e bilego e le setho sa Palamente ya Hungary o rometše lengwalo ofising ya lekala a leboga thekgo yeo ba e hweditšego go tšwa go Dihlatse.