Kua Spain, Dihlatse tša Jehofa di etela dikgolego tše 68 gomme bagolegwa ba 600 ba swarelwa thuto ya Beibele.

Yo mongwe wa Dihlatse yo a etelago dikgolego tšeo ke Miguel yo a feditšego nywaga e 12 a le kgolegong pele a eba Hlatse. Matšatši a o ya kgolegong beke e nngwe le e nngwe. Lebaka? E le gore a thuše batho ba bangwe go fetoša maphelo a bona go swana le yena.

Nywageng e seswai e fetilego, Miguel o ithutile Beibele le bagolegwa ba bantši. O re: “Ke kgahlišwa kudu ke go thuša batho bao ba lego kgolegong yeo ke bego ke le go yona. Sa go nthabiša le go feta ke ge ke bona ba tloga ba nyaka go tlogela bosenyi.”

Ge Miguel a be a na le nywaga e mene, mootledi o mongwe wa letagwa o ile a thula tatagwe ka koloi gomme a hlokofala. Ke moka mmagwe wa mohlologadi o ile a swanelwa ke go šoma ka thata gore a hlokomele lapa.

Miguel le mogolwagwe ba ile ba thoma go tšhaba sekolo gomme ba thuba dintlo le dikoloi tša batho ba ba utswetša. Ge Miguel a be a na le nywaga e 12, o be a šetše a le sesenyi. Ge a na le nywaga e 15, o be a dira tšhelete e ntši ka go rekiša dihlaretagi. Ka ge a be a diriša heroin le cocaine kudu, o ile a feleletša a utswa le go feta gore a kgone go di lefelela. Ge a na le nywaga e 16, o be a dulela go tšwa le go tsena ka kgolegong gomme a feleletša e le sesenyi se sešoro. Miguel o re: “Ke be ke ipotša gore ke tlo hwela kgolegong goba ke bolawe ke go diriša dihlaretagi kudu. Ke be ke ikwa eka ke ntši e tantšwego ke bolepu bja segokgo.”

Eupša ka 1994, yo mongwe wa bagwera ba Miguel o ile a kgopela Hlatse e nngwe gore e ngwalele Miguel yo a lego kgolegong lengwalo. Lengwalong leo Miguel o ile a ithuta ka morero wa Modimo wa go tsošološa lefase gore e be Paradeise. Mongwadi wa lengwalo leo o ile a kgothaletša Miguel gore a dire diphetogo bophelong bja gagwe gore le yena a tle a bone go phethagala ga kholofetšo yeo. Miguel o re: “Mantšu a gagwe a ile a nkgoma pelo. Dilo di ile tša thoma go fetoga letšatšing leo gomme ka phetha ka gore ke ithute Beibele, le ge go be go ka se be bonolo.”

Miguel o be a tseba gore go be go ka se be bonolo ka gobane o be a diriša dihlaretagi le motšoko kudu. O be a di hwetša gabonolo. Motho yo a bego a dula le yena ka kgolegong o be a mo nea dihlaretagi letšatši le letšatši. Ka mehla Miguel o be a rapelela matla a go tlogela dihlaretagi tše gomme mafelelong o ile a kgona.

Ka morago ga dikgwedi tše tharo, Miguel o ile a thoma go abelana ditumelo tša gagwe le bagolegwa ba bangwe. Ngwageng woo o ilego wa latela, Miguel o ile a lokollwa gomme a kolobetšwa gore e be yo mongwe wa Dihlatse tša Jehofa. O be a rerile gore a nyale eupša go ile gwa hlaga mathatanyana. Kgwedi pele ga lenyalo la gagwe, kgoro ya tsheko e ile ya ahlolela Miguel nywaga e lesome ka baka la melato e mengwe yeo e bego e sa emišitšwe. Lega go le bjalo, o ile a lokollwa ka morago ga nywaga e meraro le seripa ka baka la ge a be a itshwere gabotse. Mafelelong o ile a nyala. Ga e sa le go tloga ka nako yeo Miguel ga se a ka a boela kgolegong.