Dihlatse tša Jehofa di na le tokologo ya borapedi le go dira mediro ya tšona ya bodumedi Nageng ya Armenia di sa thibelwe ke selo. Dihlatse di ile tša ba bodumedi bjo bo lego molaong nageng ye ka October 2004.

Pele ga October 2013, bothata bjo bogolo bjo Dihlatse di bego di lebane le bjona nageng ya Armenia e be e le gore mmušo ga o dumelele badudi ba moo go dira mediro e mengwe yeo e sego ya bošole ka ge lenaneo le le le ka tlase ga taolo ya mašole le go otla bao ba ganago go tsenela bošole. Ga e sa le go tloga ka 1993, masogana a makgolokgolo a Dihlatse ao a bego a gana go tsenela bošole ka baka la letswalo a ile a golegwa mengwaga e mentši mola a mangwe a ile a kgotlelela go swarwa gampe dikgolegong. Mafelelong ka di-8 tša June, 2013, Armenia e ile ya dira gore Melao ya go Dira Mediro e Mengwe yeo e Sego ya Bošole e dumelelane le melao ya Yuropa. Ka di-23 tša October, 2013, Khomišene ya Repabliki ya Armenia e ile ya dumelelana le kgopelo ya mathomo ya Dihlatse tša Jehofa tše 57 ya go dira mediro e mengwe yeo e sego ya bošole. Lenaneo le le ile la atlega, ka ge le ile la dumelela Dihlatse gore di hlankele naga ya tšona le go dula di e na le letswalo le lebotse.

Le ge go ile gwa ba le phetogo ye e botse, Dihlatse tša Jehofa di sa dutše di kgethollwa. Mebasepala e sa dutše e gana go nea Dihlatse mangwalo a go aga meago ya yona ya borapedi, lefapha la tša kgwebo le lona le lefiša Dihlatse metšhelo ya godimo ge di hwetša dipuku tša bodumedi bja tšona tšeo di tšwago dinageng tše dingwe, le gona batho bao ba sa di ratego ba bolela maaka ka tšona mekerong ya ditaba. Dihlatse tša Jehofa di ile tša kgopela thušo dikgorong tša tsheko tša naga le dikgorong tša dinageng tše dingwe gore go rarollwe bothata bjo.