JULY 21, 2014
Austria
Dihlatse tša Jehofa di a Hlompšha Kua Kampeng ya Tshwenyo ya Gusen Memorial
SELTERS, Germany—Ka Sontaga, April 13, 2014, Kampeng ya Tshwenyo ya Gusen Memorial kua Austria go ile gwa bulwa sengwalwa sa segopotšo go gopola Dihlatse tša Jehofa tše ka bago tše 450 tšeo di bego di golegilwe ke Manazi kua kampeng ya tshwenyo ya Mauthausen le kampa ya yona e nyenyane ya Gusen. Baeng ba fetago 130 ba be ba le gona moletlong wo.
Sengwalwa sa Segopotšo se butšwe moletlong wa setšhaba wo bego o swaretšwe Kampeng ya Tshwenyo ya Gusen Memorial ka April 13, 2014.
Ge Dihlatse di fihla kampeng ya tshwenyo ya Mauthausen, molaodi yo mogolo o ile a di tšhošetša ka gore: “Ga go na Morutwana wa Beibele yo a tlago go tšwa mo a phela.” Martin Poetzinger, yo a feditšego mengwaga e senyane a golegilwe Dachau kua Mauthausen le Gusen ebile ka morago a hlanketšego e le setho sa Sehlopha se Bušago sa Dihlatse tša Jehofa kua Brooklyn, New York, o boletše se ka nako yeo a e feditšego kua Mauthausen: “Magestapo a lekile mekgwa ka moka ya go re dira gore re latole tumelo ya rena.”
May 1945: Kampa ya Tshwenyo ya Gusen. Martin Poetzinger (yo a dutšego ka pele, wa bobedi go tloga ka letsogong le letshadi) o eme le bagolegwa ba bangwe ba 23 ka morago ga gore ba lokollwe.
Dihlatse tše dingwe kua Mauthausen di ile tša išwa kampeng e nyenyane ya tshwenyo ya Gusen. Morero o mogolo wa kampa ye e be e le go bolaya ka ge go be go rulaganywa dipolao tša batho letšatši le letšatši moo. Gore di dule di tiile tumelong, Dihlatse di be di bokana bošego ka dihlotswana go ahlaahla ditemana tša Beibele tšeo di bego di di swere ka hlogo. Ka lekga le lengwe di ile tša hwetša Beibele. E be e arotšwe ka dikarolwana tše mmalwa, gomme Dihlatse di be di šiedišana ka yona. Ge di ikutile ka tlase ga mepete ya tšona, di be di diriša nakwana yeo di e hwetšago go bala.
Ka bohlale Dihlatse di be di bolela le ba bangwe ka molaetša wa Beibele. Bagolegwa ba bahlano ba Mapolishi ba ile ba ithuta Beibele le Dihlatse gomme ba kolobetšwa ka sephiring ka gare ga legopo leo le bego le diretšwe kolobetšo. Hlatse e nngwe yeo e bitšwago Franz Desch e ile ya boledišana ka molaetša wa Beibele le molaodi wa SS yo ka morago a ilego a ba Hlatse ya Jehofa.
Wolfram Slupina, e lego mmoleledi wa Dihlatse tša Jehofa kua Austria o boletše gore: “Re thabile kudu gore Dihlatse di gopolwa ka tumelo le sebete sa tšona ge di be di le dikampeng tša tshwenyo kua Mauthausen le Gusen. Maikemišetšo a tšona a go bontšha kwelobohloko ya Bokriste le botho bathong ka moka a ile a fenya bobe gomme se se swanelwa ke theto le go ekišwa.”
Ba Ditaba:
Bakeng sa Ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000
Austria: Wolfram Slupina, mogala +49 6483 41 3110
You May Also Like
DITABA TŠE DI LOKOLOTŠWEGO
Baphologi ba Kampa ya Auschwitz le Dihlatse tša Jehofa ba Gopolwa ka Morago ga Mengwaga e 70 ba Lokolotšwe
Ka January 27, 2015, baphologi ba Auschwitz, gotee le baeng ba mmušo ba tšwago dinageng tše dingwe le baeng ba bangwe ba diketekete, ba ile ba gopola mengwaga e 70 ya go lokollwa dikampeng tša tshwenyo tša Manazi Jeremane le kampa ya lehu.
DITABA TŠE DI LOKOLOTŠWEGO
Go Bulwa ga Segopotšo sa Mophologi wa Dipolao tše Sehlogo Kua Jeremane
Ke eng seo se neilego mohu Max Liebster matla a go phologa dikampa tše hlano tša Manazi?
DITABA TŠE DI LOKOLOTŠWEGO
Richard Rudolph wa Kua Jeremane, Yoo a Ilego a Tlaišwa Kampeng ya Tshwenyo, o Hlokofetše a na le Mengwaga e 102
Richard Rudolph, o ile a kgotlelela mengwaga e fetago e 19 a golegilwe ka tlase ga pušo ya Manazi le Makomanisi ka baka la ditumelo tša gagwe tša bodumedi.
DITABA TŠE DI LOKOLOTŠWEGO
Sachsenhausen Memorial e Hlompha Hlatse ya Jehofa Yeo e Bolailwego ke Manazi
Ka September 16, 2014, Brandenburg Memorials Foundation e be e dirile segopotšo sa mengwaga e 75 sa lehu la August Dickmann kua kampeng ya tshwenyo ya Sachsenhausen. E bile wa pele wa go bolawa ke Manazi kua Jeremane nakong ya Ntwa ya Bobedi ya Lefase ka ge a ganne go tsenela bošole ka baka la letswalo.