PUENTE ALTO, Chile—Ka April 13, 2014, mollo wa hlaga wo o bego o gakatšwa ke diphefo tše maatla tše di tšwago Lewatleng la Pacific o ile wa baka tshenyo e kgolo go phatša motse wa Valparaíso kua Chile. Kgabo ya mollo e bolaile batho ba ka bago 15 gomme ya gobatša ba bangwe ba 500. Magae a ka bago 2 900 a sentšwe o šoro gomme batho ba fetago 10 000 ba hudušitšwe lefelong leo.

Ofisi ya lekala ya Dihlatse tša Jehofa ya kua Chile e begile gore monna yo mongwe yo a tšofetšego wa Hlatse o gare ga bao ba hlokofetšego. Go oketša mo, Dihlatse tše ka bago 89 di lahlegetšwe ke magae a tšona. Ba bantši ba bao ba hudušitšwego ba hweditše madulo magaeng a barapedigotee le bona. Gateetee ofisi ya lekala e ile ya hloma komiti ya tlhakodišo yeo e neago thušo go baphologi. Dihlopha tšeo di rulagantšwego di šetše di thomile go hlwekiša lefelong leo. Ge maemo a dumela, ba tla thoma ka mošomo wa go aga lefsa magae a ka bago a 28 a Dihlatse ao a sentšwego ke mollo.

Jason D. Reed e lego seboleledi sa Dihlatse tša Jehofa kua Chile, o boletše gore: “Re kwešitšwe bohloko ke go kwa ka tlaišego ya baagišani ba rena yeo e bakilwego ke mollo wa hlaga. Re nyamišitšwe ke go lahlegelwa ke barapedigotee le rena, le gona re bea bao ba lahlegetšwego ke bagwera goba ditho tša malapa dithapelong tša rena. Re tla tšwela pele re thekga baphologi bao ka ditlabakelo tša tlhakodišo le se sengwe le se sengwe seo se ka ba thušago go lebeletšana le ditlamorago tše bohloko tšeo di bakilwego ke tshenyo.”

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Ditšhabatšhaba, mogala +1 718 560 5000

Chile: Jason D. Reed, mogala +56 2 2428 2600