KUA Selters, Jeremane, Mathilde Hartl e lego yo mongwe wa Dihlatse tša Jehofa o ile a newa Sefoka ka February 22, 2013, ke Tonakgolo ya Bavaria e lego Horst Seehofer. Sefoka seo ke sa maemo a godimo kudu seo Federal Republic of Germany e se neago batho bao ba hotšego setšhaba.

Mohumagadi Hartl, yo a dulago kua Bavaria, o ile a newa sefoka seo ka baka la ge a tšere nako e telele a hlokometše morwa wa gagwe wa segole e lego Martin, yoo ga bjale a nago le nywaga e 26. Morwa yo o ile a hwetšwa a na le bolwetši bja Duchenne muscular dystrophy (DMD), e lego bolwetši bjoo bo tsebjago ka go šitiša kgolo ya mešifa le go dira gore e se be matla. Ka baka leo, Mohumagadi Hartl o tsoga le gare ga bošego gore a hlokomele morwa yo, e lego seo se akaretšago go hlokomela gore o hema gabotse le go mo thibolla dinko gore a se tsenwe ke bolwetši bja nyumonia. Morwa wa gagwe yo mongwe e le go Max, le yena o be a na le bolwetši bja DMD le bothata bja monagano. Mohumagadi Hartl o hlokometše Martin le Max ka nywaga e mentši. Ka maswabi, Max o hlokofetše ka 2008, a na le nywaga e 19.

Ge a botšišwa gore o hwetša kae matla a go hlokomela batho ka tsela yeo, Mohumagadi Hartl o arabile ka gore: “Go tšwa go ditumelo tša bodumedi bja ka. Ka ge ke le yo mongwe wa Dihlatse tša Jehofa, ke hlompha bophelo kudu. Ke leka kamoo nka kgonago ka gona go dira gore morwa wa ka a ipshine ka bophelo le ge a golofetše.”

Tonakgolo Seehofer o ile a reta Mohumagadi Hartl le ba bangwe bao ba bego ba newa difoka bjalo ka yena ka gore: “Yo mongwe le yo mongwe wa lena o dirile gore dilo di be kaonenyana lefaseng le.”