EBINA, Japane—Mesong ya August 20, 2014 dipula tše maatla kua Hiroshima di bakile go elela ga leraga leo le sentšego o šoro le go bolaya batho ba 74 gomme la tlogela ba 1 600 ba se na magae. Ofisi ya lekala ya Dihlatse tša Jehofa kua Japane e begile gore ga go Hlatse ya Jehofa yeo e hlokofetšego goba go gobala, eupša magae a seswai a Dihlatse a sentšwe ke kotsi ye.

Pula ye e nele diiri tše tharo feela le go baka tshenyo e kgolo kudu, gomme se sa gapeletša mmušo go tla ka leano la tlhakodišo. Ofisi ya lekala ya Japane e ile hloma kapejana komiti ya tlhakodišo le go rulaganya baithaopi ba Dihlatse bao ba ka thušago ka go hlwekiša. Dihlopha tše tša baithaopi di ile tša dira mothaladi woo di bego di neeletšana ka pakete ya leraga go tloša ditšhila le santa yeo e bego e tletše dintlong tša batho. Ka morago ga go kgetha dithoto tšeo di bego di se tša senyega kudu, baithaopi ba ile ba hlwekiša dintlo tšeo di bego di šilafetše.

Kuranta ya Japane yeo e bitšwago Yomiuri Shimbun e ile ya bolela ka Hlatse yeo e phologilego kotsi ye. Kuranta ye e begile gore Kayoko Nakamizo yo a bego a dula Yagi seleteng sa Asaminami Ward, o ile a kgona go tšwa ntlong ya gagwe gomme a eta a “kokotela baagišani ba gagwe ka moka a hlola ge eba ba šireletšegile.” Ka baka la se, Kayoko o ile a kgona go thuša go phološa moagišani wa gagwe le go thuša ba bangwe go tloga lefelong le le kgomilwego ke kotsi.

Ichiki Matsunaga, e lego mmoleledi wa Dihlatse tša Jehofa kua Japane o boletše gore: “Re lla le bao ba kgomilwego ke kotsi ye. Go sa šetšwe mathata a, re dira sohle seo re se kgonago le go ba le boemo bjo bobotse bja kgopolo ge re dutše re thuša le go kgothatša baagišani ba rena.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Japane: Ichiki Matsunaga, mogala +81 46 233 0005