Go hlokofetše batho ba e ka bago ba 169 bodikela bja Japane. Gomme dintlo tšeo di fetago 255 000 di ile tša se sa ba le meetse a go nwa, seo se diregile ka morago ga gore go ne pula e kgolo yeo e ilego ya baka mafula le maraga.

Ga go Hlatse ya Jehofa yeo e hwilego kotsing yeo, eupša go gobetše mosadi o tee, mola dintlo tše 200 tša Dihlatse tša Jehofa le tšona di ile tša senyega. Mosadi yoo a gobetšego o ile a išwa sepetlele gore a alafiwe, gomme ga bjale o kaone. Dintlo tše e ka bago tše 103 tša Dihlatse tša Jehofa di ile tša senyega, gomme e tee ya tšona e ile ya senyega gwa go se lokišege. Diholo tša Dihlatse tša Jehofa tše 11 le Holo ya tšona e tee ya Kopano di ile tša senywa ke mafula.

Ofisi ya lekala ya Dihlatse tša Jehofa e ile ya hloma Dikomiti tše nne tša Tlhakodišo gore di yo kgothatša Dihlatse tšeo di bego di amegile kotsing yeo ka Mangwalo a Beibele, go di thuša ka dijo, diaparo le meetse ao a hlwekilego. Dikomiti tše di ile tša rulaganya gape le gore Dihlatse tšeo tša Jehofa di thušwe ka dilo tše dingwe, tše bjalo ka go hlwekiša mafelo a tšona, go di thuša gore di se tsenwe ke ditwatši le go di lokišetša dintlo tša tšona.

Re rapelela Dihlatse tša Jehofa tša Japane tšeo di amegilego kotsing yeo, gore di kgotlelele ka ge re sa emetše nako yeo Jesu a tlago go diriša matla a gagwe go tlo fedišetša dikotsi sa ruri mo lefaseng.—Mateo 8:26, 27.