Ka di-2 tša May 2017, kgoro ya tsheko ya Astana e ile ya ahlolela Teymur Akhmedov mengwaga e mehlano kgolegong feela ka baka la gore o be a botša batho ba bangwe ka ditumelo tša bodumedi bja gagwe. Ga e sa le Kazakhstan e thomile go ipuša ka 1991, Teymur Akhmedov ke Hlatse ya Jehofa ya mathomo nageng ye, yeo e bonwego molato ka baka la mediro ya bodumedi.

Morena Akhmedov o dutše kgolegong dikgwedi tše di fetago tše tharo a letetše go sekišwa, le ge dinaga tše dingwe di nyaka gore kgoro ya tsheko e mo lokolle gore e be mogolegwa a le ka gae. O na le mengwaga e 61, e bile o na le mosadi le barwa ba bararo gomme o a babja.

Morena Akhmedov o thomile go tlaišwa ka January 2017, ge maphodisa a ka sephiring a Komiti ya go Šireletša Setšhaba nageng ya Kazakhstan (National Security Committee [KNB]) a mo swara ka ge a be a re o dira dilo tšeo di lwantšhanago le molao woo o lego go Article 174(2) wa mabapi le go dira bosenyi nageng yeo. Komiti yeo ya KNB e ile ya mo latofatša ka gore o “hlohleletša . . . madumedi gore a hloyane” ka go botša batho ba bangwe ka ditumelo tša bodumedi bja gagwe ka sephiring.

Moahlodi Talgat Syrlybayev o phethile ka gore seo Morena Akhmedov a bego a se bolela, se tutueditše madumedi gore a lwe e bile se dira gore batho ba ipone ba phagametše ba bangwe setšhabeng ka baka la bodumedi bja bona. Le gona Moahlodi o phethile ka gore Morena Akhmedov a se be le tokologo ya go dira mediro ya bodumedi bja gagwe ka mengwaga e meraro, seo ge e le gabotse ke go mo thibela go hlankela Modimo wa gagwe.

Philip Brumley wa Lefapha la tša Molao la Dihlatse tša Jehofa o itše: “Mmušo o diriša molao ka tsela e sego ya maleba. Ka 2016, banna ba mmalwa ba ile ba laletša Teymur moagong o itšego go tlo boledišana le yena ka ditumelo tša bodumedi bja gagwe. Banna bao, ba ile ba ya le ka lapeng la gagwe. Teymur o be a sa tsebe gore dipoledišano tšeo di be di rekhotilwe ka sephiring gore a tle a latofatšwe ka tšona. Seo se bontšha gore mmušo o tloga o nyaka go thibela mediro yeo Dihlatse tša Jehofa di e dirago ka khutšo le go di bona molato. Taba ye e tloga e le go hloka toka.”

Go oketša moo, lapa la Morena Akhmedov le tshwenyegile kudu ka gobane o a babja. O na le serurugi seo se tšwago madi (a ka ba a na le kankere), eupša mmušo o ganne kgopelo ya gore Morena Akhmedov e be mogolegwa a le ka gae e bile ga se wa mo nea kalafo yeo a e hlokago ka tšhoganetšo. Boramolao ba gagwe ba dirile boipiletšo go Sehlopha sa Bašomi sa Ditšhaba tše Kopanego sa Bagolegwa, go Mmegi yo a Kgethegilego wa ditaba tša Ditšhaba tše Kopanego tša mabapi le tokologo le tumelo ya bodumedi le go Mmegi yo a Kgethegilego wa ditaba tša Ditšhaba tše Kopanego tša ditokelo tša go bokana ka khutšo.

Dihlatse tša Jehofa tša Kazakhstan di ile tša lebeletšana le ditlhohlo tše dintši ge di leka go dira mediro ya tšona ya bodumedi. Lega go le bjalo, go golegwa ga Morena Akhmedov ka go hloka toka ke selo seo se thomago go direga e bile se a tšhoša. Baemedi ba Dihlatse tša Jehofa ba tšwela pele ka go dira boipiletšo bja go kgopela mmušo wa Kazakhstan gore o hlomphe keno yeo o e dirilego le dinaga tše dingwe ya go thekga tokologo ya go dira mediro ya bodumedi ntle le tšhitišo.