Ka di-30 tša January 2017, Kgoro ya Tsheko ya Astana e ile ya gana boipiletšo bja go lokolla Teymur Akhmedov le Asaf Guliyev ge ba be ba golegilwe pele ba sekišwa. Ba golegilwe ka di-18 tša January ka ge ba ile ba boledišana le sehlopha sa banna bao ba bego ba itira eka ba nyaka go ithuta ka bodumedi bja Dihlatse tša Jehofa. Dihlatse tšeo tše pedi di ile tša bewa molato wa gore di “aroganya madumedi” le gore “di bolela gore [bodumedi] bja tšona ke bjona feela bja therešo.” Kgoro yeo ya tsheko ga se ya tšweletša bohlatse bja gore Dihlatse tšeo di be di swanetše go golegwa.

Phetho ya gore di golegwe e ile ya latelwa gomme ga di dumelelwe go dira boipiletšo bjo bongwe. Teymur le Asaf ba swanetše go dula kgolegong go fihlela dinyakišišo tša mabapi le molato wa bona di phethilwe. Ge ba ka bonwa molato, gona ba ka ahlolelwa go dula kgolegong mengwaga e mehlano go ya go e lesome.