JANUARY 27, 2015
Kazakhstan
Dihlatse di Lokolla Beibele ya Sekazakh le go Laletša Bohle go tlo e Bona
Gerrit Lösch wa Sehlopha se Bušago sa Dihlatse tša Jehofa o lokolla Beibele ya Phetolelo ya Lefase le Lefsa ya Mangwalo a Makgethwa ka Sekazakh.
ALMATY, Kazakhstan—Go lokolotšwe Beibele ya Phetolelo ya Lefase le Lefsa ya Mangwalo a Makgethwa ka Sekazakh kopanong ya Dihlatse tša Jehofa ya September 26-28, 2014. Batho ba 3 721 bao ba bilego gona ba ile ba hwetša Dibeibele tše difsa.
Dr. Alexander Garkavets, e lego setsebi sa setlogo sa Seturkic, ge a bolela ka Phetolelo ya Lefase le Lefsa ya Sekazakh o re: “Le ge go se na dingwalwa tše dintši tša go fetolela Mangwalo a makgethwa ka Sekazakh, Dihlatse tša Jehofa di dirile mošomo o mobotse. Mošomo wa tšona o a retega ka ge di dirišitše mekgwa e mefsa ya go fetolela dikgopolo go tšwa Seisemaneng go ya go Sekazakh. Phetolelo ya Lefase le Lefsa e dirišitše leleme leo le kwešišwago ke batho bohle.”
Nakong ya ge batho ba laleditšwe: Dihlatse di ile tša hloma tente yeo batho ba bego ba hwetša dijo le dino.
Beke ka morago ga kopano yeo, ka October 3, ofisi ya lekala ya Dihlatse tša Jehofa ya Kazakhstan e ile ya laletša batho bohle go tlo bona Beibele e mpsha ya Sekazakh. Boraditaba ba Radio ya Azattyq ba Kazakhstan ba begile gore: “Go be go tlile baemedi ba Akimat (baemedi ba mmušo) ba toropo ya Almaty, bao ba bego ba na le balaodi ba Lefapha la Ditaba tša Bodumedi, e lego Mna. Nurzhan Zhaparkul, baemedi ba dinaga tše dingwe, ditsebi tša dithuto tša bodumedi le ba bangwe.” Mna. Zhaparkul o itše: “Dihlatse tša Jehofa di re amogetše ka diatla tše pedi tiragalong ye Almaty. Seo ba se dirilego se a retega gomme se tla re thuša kudu.”
Nurzhan Zhaparkul (yo a lego bogareng ba senepe), mookamedi wa Lefapha la Ditaba tša Bodumedi le baemedi ba bangwe ba Komiti ya Merero ya Bodumedi ba bontšhwa ofisi ya lekala ya Dihlatse tša Jehofa nakong ya ge batho bohle ba laleditšwe.
Batho ba Almaty ba ile ba fiwa ditaletšo tša go tlo bona Beibele.
Mmoleledi wa Dihlatse tša Jehofa wa Kazakhstan, e lego Polat Bekzhan, o re: “Batho ba bantši ba thabetše kopano ya rena ngwageng wo e bile bao ba bolelago Sekazakh ba thabetše Beibele ye. Ge re be re laletša bohle go tlo bona Beibele ye, re be re nyaka gore baemedi ba mmušo, boraditaba le baagišani ba tlwaelane le Dihlatse tša Jehofa.”
Ba Ditaba:
Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000
Kazakhstan: Polat Bekzhan, mogala +7 727 232 36 62
You May Also Like
GO BONA DIOFISI LE MEAGO
Diofisi le Bao ba Tlilego go Bona Meago ya Lekala: Kazakhstan
Baeng ba ka tla ba bona meago ya lekala mahala.
MODIRO WA GO GATIŠA
Batho ba Hwetša Dibeibele ka Segagabo Bona
Phetolelo ya Lefase le Lefsa ya Mangwalo a Makgethwa e newa mahala go motho le ge e le ofe yoo a nyakago go e bala.