MARCH 2, 2015
Kyrgyzstan
Na Tokologo ya Bodumedi e tla Tsoga e Bile Gona Kyrgyzstan?
Ka September 4, 2014, tokologo ya bodumedi e ile ya kaonefala Kyrgyzstan, ge Lekgotla la Molaotheo wa Naga la Kgorokgolo ya Tsheko le be le bolela gore dikarolo tše dingwe tša Melao ya Bodumedi yeo e dirilwego ka 2008 ga di thekgwe ke molaotheo wa naga. Se se dirile gore Dihlatse tša Jehofa di kgone go ngwadiša bodumedi bja tšona dileteng tša ka borwa bja Kyrgyzstan. *
Go sa šetšwe kahlolo ye, State Committee on Religious Affairs (SCRA) e lego komiti yeo e hlokomelago ditaba tša bodumedi e sa dutše e gana go ngwadiša Dihlatse ka molao dileteng tša ka borwa tša Kyrgyzstan. SCRA e boletše gore go fihlela ge palamente e fetoša Melao ya Bodumedi ya 2008, molao o ngwadilwego gona bjale o sa dutše o tla dirišwa gomme o thibela Dihlatse tša Jehofa go ingwadiša go ba mokgatlo wa bodumedi. Ka gona, bodumedi bjo bo ngwadišitšwego ka molao ka leboa, bo a kgethollwa le go thibelwa ka borwa bja Kyrgyzstan. *
Go Golegwa ka Baka la go Dira Mediro ya Bodumedi
Ka June 30, 2014, toropong ya Naryn, yeo e lego ka borwabohlabela bja Kyrgyzstan, Zhyldyz Zhumalieva wa mengwaga e 46 o be a boledišana le moagišani wa gagwe ka ditumelo tša gagwe. Balaodi ba mmušo wa Naryn ba ile ba mo golega ka baka la go boledišana le baagišani ka ditumelo tša gagwe le ka ge e le setho sa mokgatlo wa bodumedi wo o sa ingwadišago. * Go tloga ka nako yeo Kyrgyzstan e thomago go ipuša, ke la mathomo Hlatse e sekišwa ka baka la mediro ya bodumedi.
Ka ge Moh. Zhumalieva a ile a dira boipiletšo, Kgoro ya Tsheko ya Selete ya Naryn e ile ya theetša molato wo ka August 5, 2014. Baahlodi ba ile ba botšiša dipotšišo tše dintši ba nyaka go kwešiša Dihlatse tša Jehofa le molaetša wo di boledišanago le baagišani ba tšona ka wona. Ka morago ga go hlahloba bohlatse ka moka, baahlodi ba ile ba fega molato wo ba sa letetše gore Lekgotla la Molaotheo wa Naga le fetoše Melao ya Bodumedi.
Ka morago, Kgoro ya Selete ya Naryn e ile ya ahlaahla gape molato wa Moh. Zhumalieva. Kgoro e ile ya se mmone molato gomme ya hlalosa gore molaotheo o bolela gore batho ka moka ba na le tokelo ya go dira mediro ya bodumedi bja bona. Go ya ka kahlolo ya Lekgotla la Molaotheo wa Naga, kgoro e ile ya lemoga gore bodumedi bja Dihlatse tša Jehofa bo ngwadišitšwe dikarolong tše dingwe tša Kyrgyzstan. Kgoro ye ya Selete e ile ya phumola kotlo, eupša motšhotšhisi o ile a dira boipiletšo mabapi le kahlolo ye, gomme a bolela gore kahlolo ya Lekgotla la Molaotheo wa Naga ga e tsene felo melatong ya bosenyi. Ka December 24, 2014, Kgorokgolo ya Tsheko e ile ya phaela ka thoko boipiletšo bja gagwe, gomme ya dumelelana le kahlolo ya Kgoro ya Selete ya Naryn ya gore molato wa Moh. Zhumalieva o phumolwe le gore a tšwele pele a boledišana le baagišani ka ditumelo tša gagwe.
Go Bontšhwa Toka le ge ba Latofatšwa ka Maaka Toropong ya Osh
Ka 2013, Oksana Koriakina le mmagwe, e lego Nadezhda Sergienko, ba ile ba tswalelelwa ka ntlong ka semolao (house arrest) ka melato yeo go thwego ba e dirile ge ba be ba boledišana le batho ba bangwe ka ditumelo tša bona. Balaodi ba mmušo wa Osh ba ile ba diriša maaka go latofatša Dihlatse tša Jehofa ka gore “bodumedi bja tšona ga bo molaong.” Balaodi ba ile ba hlalosa gore ge e ba mokgatlo wa bodumedi o se wa ngwadišwa ka molao, Dihlatse tša Jehofa ga se tša swanela go dira mediro ya bodumedi bja tšona.
Kgoro ya motse wa Osh e ile ya phumola melato ya basadi bao ba babedi. Ge moahlodi a ahlola ka October 7, 2014, o ile a re banyakišiši ba be ba sa nyakišiša gabotse molatong wo le gona ba be ba latofaditše Moh. Koriakina le Moh. Sergienko ka gobane e le Dihlatse tša Jehofa.
Motšhotšhisi wa Osh o ile a ipiletša go kgoro gore e phumole kahlolo ya yona. O ile a bolela gore molato o swanetše go bušetšwa go banyakišiši ba molato gore ba lokiše diphošo tšeo ba di dirilego gomme molato wa Moh. Koriakina le Moh. Sergienko o tle o sekwe gape. Ge kgoro ya Osh e phaela ka thoko boipiletšo bja gagwe, motšhotšhisi o ile a ipiletša Kgorongkgolo ya Tsheko ya Kyrgyzstan. Kgoro e beile letšatši la March 3, 2015 gore molato wo o theetšwe gape, gomme Dihlatse di holofela gore kahlolo ya letšatši leo e tla ba ya toka.
Na Kyrgyzstan e tla Kaonefatša Goba ya Gatelela Tokologo ya Bodumedi?
Hlatse e nngwe ya Jehofa yeo e bego e le gona ge Ms. Zhumalieva a sekišwa e itše: “Go tloga ka 1998, balaodi ba mo ba be ba dutše ba re gatelela ka gobane bodumedi bja rena ga se bja ngwadišwa toropong ya Naryn. Gona bjale ka baka la dikahlolo tše di dirilwego ke Kgorokgolo ya Tsheko, re holofela gore bodumedi bja rena bo tla ngwadišwa ka molao.”
Dihlatse tša Jehofa di fagahletše go ngwadiša bodumedi bja tšona motseng wa Osh, toropong ya Naryn le ka borwa bja Kyrgyzstan gore di kgone go tšwela pele ka borapedi bja tšona di sa tshwenywe. Ge e ba Kyrgyzstan e latela seo kgorokgolo ya tsheko e se bolelago, e tla kaonefatša tokologo ya bodumedi.
^ ser. 2 Bona sehlogo se rego: “Kgorokgolo ya Tsheko ya Boipiletšo ya Kyrgyzstan e Thekga Tokologo ya Dihlatse tša Jehofa” go kwa seo se diregilego ka September 4, 2014, mabapi le kahlolo ya Lekgotla la Molaotheo la Kgorokgolo ya Tsheko.
^ ser. 3 Dihlatse di dumelelwa ke molao wa naga go ka ngwadiša bodumedi bja tšona, le gona bodumedi bja tšona bo ngwadišitšwe dikarolong tša ka leboa la naga. Eupša balaodi ba mmušo ba ganne gantši gore di ngwadišwe dikarolong tša ka borwa.
^ ser. 5 Article 395(2) ya sengwalwa sa Administrative Code sa Kyrgyz Republic e thibela go tshela “melao ya go rulaganya le go swara diboka tša bodumedi le ditirelo tše dingwe tša bodumedi.”
You May Also Like
DITABA TŠE DI LOKOLOTŠWEGO
Kgorokgolo ya Tsheko ya Boipiletšo ya Kyrgyzstan e Thekga Tokologo ya Dihlatse tša Jehofa
Ka September 4, 2014, Repabliki ya Kyrgyz e ile ya thekga boitlamo bja yona bja boditšhabatšhaba bja go hlompha ditokelo tša batho ka go dumelela Dihlatse tša Jehofa go dira mediro ya tšona ya bodumedi nageng ka bophara.